"Манчестер Сити" ҳимоячиси "Вест Хэм"га ўтишни истамади

"Манчестер Сити" ҳимоячиси Натан Аке қишда жамоасини алмаштириш ниятида. Нидерландия терма жамоасининг 30 ёшли ҳимоячиси АПЛ жадвалида 18-ўринни эгаллаб турган "Вест Хем"га ўтишдан бош тортди.

talkSPORT хабар беришича, Аке бу қишда "Сити"дан кетишга қарши эмас, бироқ лигада қолиш учун курашаётган жамоага ўтишни истамаяпти. Футболчига "Ньюкасл", "Борнмут", "Кристал Пэлас" клублари ҳам қизиқиш билдирмоқда.

"Шаҳарликлар" шартномаси яна бир ярим йилга мўлжалланган Натанни 21 миллион фунтга баҳоламоқдалар.

Испания оммавий ахборот воситалари "Барселона" Акени жиддий жароҳат олган Андреас Кристенсеннинг ўрнини босувчи сифатида кўриб чиқиши мумкинлигини маълум қилган эди, аммо "Ман Сити"нинг талаблари трансферни деярли амалга ошириб бўлмайдиган даражага олиб келмоқда.

Бу мавсумда Аке АПЛда атиги 8 та ўйин ўтказди ва фақат икки марта асосий таркибда майдонга тушди.