"Локомотив"нинг навбатдаги рақиби - "Андижон"

Бугун "темирйўлчилар" ўз майдонларида ўйинолди машғулотни ўтказишади ва шундан сўнг водий томон йўл олишади.

БЎЛАЖАК ЎЙИН ҲАҚИДА
"Локомотив" ички чемпионатнинг 1-турини сафарда "Навбаҳор"га қарши ўтказиб, 3:2 ҳисобида зафар қучди. Шу куни Сардор Мирзаевнинг дубли ва Санжар Шоаҳмедов томонидан урилган гол пойтахтликларга чемпионатдаги илк уч очкони келтирди. "Навбаҳор" билан кечган баҳсда "Локо" қуйидаги таркибда ҳаракат қилди:

"Локомотив": 1. Игнатий Нестеров, 5. Кахи Махарадзе, 10. Марат Бикмаев (77. Жасур Ҳасанов, 73), 11. Темурхўжа Абдухолиқов (21. Дониёр Усмонов, 77), 15. Сардор Мирзаев, 17. Салим Мустафоев, 18. Тимур Кападзе, 20. Ислом Тўхтахўжаев, 22. Санжар Шоаҳмедов (7. Садриддин Абдуллаев, 87), 33. Олег Зотеев, 37. Шерзод Файзиев.

Эртага бўлиб ўтадиган "Андижон"га қарши баҳс соат 16:30да бошланади. Мазкур беллашувда ҳам мухлислар қизиқарли қарама-қаршилик гувоҳига айланса ажаб эмас. Чунки ҳар иккала жамоа ҳам бор кучи билан ҳаракат қилади, қолаверса, водийдаги ўйинларда стадион доим ишқибозлар билан тўлган бўлади. Шунингдек, эртага Андижонда мавсумнинг очилиш учрашуви бўлишини ҳам унутмаслик лозим.

РАҚИБ ҲАҚИДА
"Андижон" олий лигада ўз ўрнига эга клублардан ҳисобланади. Рақиб ўтган мавсумни 13-ўринда тугатди. Ушбу кўрсаткич клуб раҳбариятига маъқул келмаган кўринади, жамоа янги мавсумни янги бош мураббий бошчилигида бошлади. "Андижон"га Бахтиёр Ашурматов бош мураббий этиб тайинланди. Олий лиганинг илк учрашувини "Пахтакор"га қарши ўтказган андижонликлар 1:2 ҳисобида ютқазиб қўйишди. Бу ўйинда "Андижон" қуйидаги таркибда ҳаракат қилди:  

"Андижон": Хуршид Хўжаев, Даврон Турсунов, Азамат Исроилов, Иқбол Бобохонов, Иброҳим Отахонов (Неманья Йованович, 49), Алишер Шоғуломов, Отабек Валижонов, Фарҳод Бекмуродов (Ғулом Ўрунов, 53), Жавлон Гусейнов, Иброҳим Раҳимов (Исломбек Исоқжонов, 64), Роббим Ҳасанов.

"Пахтакор"га қарши баҳсда меҳмонлар таркибида 9 нафар янги футболчи ҳаракат қилди. Булар - Хуршид Хўжаев, Азамат Исроилов, Неманья Йованович, Алишер Шоғуломов, Отабек Валижонов, Ғулом Ўрунов, Иброҳим Раҳимов, Исломбек Исоқжонов ва Роббим Ҳасанов.

ЎЗАРО ЎЙИНЛАР ҲАҚИДА
Жамоалар шу пайтгача миллий чемпионатда ўзаро 18 марта тўқнаш келишган. Устунлик асосан "Локомотив" томонида. Тошкентликлар 11та ўйинда ғолиб бўлишган, уч бор дуранг ўйнаб, тўрт марта мағлубиятга учрашган. Тўплар нисбати ҳам "Локо" фойдасига: 31-19. Ўтган йил Андижонда бўлиб ўтган беллашувда "Локомотив" 2:1 ҳисобида ғалаба қозонганди. Ўйин қайдномаси қуйидагича:

Олий лига-2015. 23-тур. 25 сентябрь
АНДИЖОН - ЛОКОМОТИВ - 1:2 (0:0)

Ҳакам: Илгиз Танташев - 8,5
Голлар: 0:1 - Тимур Кападзе, 56. 0:2 - Санжар Шоаҳмедов, 71. 1:2 - Анвар Бердиев (пенальти, 81).

"Андижон": Мошняга, Ҳусанов, Турсунов, Бобохонов, Отахонов, Жадигеров (Асқаралиев, 61), Абдуллаев (Абдуқодиров, 75), Бердиев, Аъзамов (Жумабоев, 41), Гусейнов, Алимов.
"Локомотив": Нестеров, Абдухолиқов (Бикмаев, 53), Тўраев, Ҳасанов, Мустафоев, Кападзе, Тўхтахўжаев (Муллажонов, 77), Шоаҳмедов, Алибоев, Яничич, Ҳасанов (Зотеев, 86).

Андижонда бўлиб ўтган охирги бешта учрашувнинг тўрттасида "Локомотив" ғалаба билан қайтган, фақат бир бор майдон эгалари зафар қучишган.

ҲАКАМ ҲАҚИДА
"Андижон" - "Локомотив" баҳсини Рустам Бобомуродов бошқариб боради. Унга қанотларда Обид Жумаев билан Алишер Усмонов ёрдам беришади. Навоийлик ҳакам ўтган йил "Локомотив"нинг 4та ўйинини бошқарган ва барчасида "темирйўлчилар" ғалаба қозонишган: "Сўғдиёна" - "Локомотив" 1:3, "Нефтчи" - "Локомотив" 1:2, "Локомотив" - "Бухоро" 2:0, "Навбаҳор" - "Локомотив" 2:3.

Бобомуродов ўтган йил "Андижон" иштирокидаги битта баҳсни бошқарган: "Андижон" - "Олмалиқ" 2:4.

"Локомотив" матбуот хизмати.