"Локомотив" ярим ҳимоячиси Оника Молдова терма жамоасига чақирилди

Мазкур ўйин олдидан ташкил этиладиган йиғинга миллий терма жамоамиз бош мураббийи Миржалол Қосимов 30 нафар футболчини жалб қилган. Эътиборлиси, улар сафида Тошкентнинг «Локомотив» клуби аъзолари ҳам бор. Миржалол Қўшоқовичнинг рўйхатидан темирйўлчилар – Ислом Тўхтахўжаев, Ислом Иномов, Жасур Ҳасанов, Иван Нагаев ҳамда Фарҳод Тожиевлар ўрин олишган. Дарвоқе, жамоа таркибига «Локомотив» аъзоси сифатида киритилган яна бир футболчи Санжар Турсунов эса яқинда Оренбургнинг «Газовик» клуби билан шартнома имзолади. Миллий чемпионат ўйинларида ўз тўпурарлик салоҳиятини намойиш қилаётган Фарҳод Тожиев мамлакат бош жамоасига ёрдам беролмайди. Боиси, у Ўзбекистон кубоги доирасидаги «Бунёдкор» – «Локомотив» баҳсида жароҳат олди. Унинг тўлиқ тикланиб сафга қайтиши учун уч ҳафта талаб қилинади.

«Локомотив»нинг янги легионери Александру Оника ҳам ўз терма жамоаси йиғинига таклиф этилди. Молдова миллий терма жамоаси бош мураббийи Иван Карас 14 август куни Андоррага қарши кечадиган ўртоқлик ўйини учун кенгайтирилган рўйхатни эълон қилди. Ушбу рўйхатдан «Локомотив» клуби аъзоси Александру Оника ҳам ўрин олган. Ўртоқлик учрашуви Кишинёвдаги «Зимбру» стадионида ўтказилади.