"Локомотив" кундалиги: Абу Дабидаги тўртинчи кун. Майдон, тренажёр, майдон

Янги мавсумнинг дастлабки хориж йиғинини Абу Дабида ўтказаётган "Локо" футболчилари бугун ҳам икки маҳал машғулот ўтказишди. Эрталабки машғулот тўлиқ майдонда кечган бўлса, тушдан кейин футболчиларимиз дастлаб тренажёр залида шуғулланишди. Мавсумлар оралиғида тренажёрда шуғулланиш муҳим аҳамият касб этади. Бу айниқса ҳар бир ўйинчининг жисмоний ҳолатини бир маромда ушлаб туришда катта ёрдам беради. Шу боис жамоамиз мураббийлари жисмоний машқларга алоҳида эътибор қаратишяпти.

Сўнгра ҳамма футбол майдонига йўл олди. Дарвозабонлар билан одатдагидек Петр Гизимчук ишлаган бўлса, майдондаги ўйинчилар билан Андрей Фёдоров (бош мураббий), Андрей Микляев (катта мураббий) ва Александр Шатских (жисмоний тайёргарлик бўйича мураббий) ишлашди. 

Эслатиб ўтамиз, янги мавсум "Локо" учун 21 январдан бошланади. Шу куни "темирйўлчилар" ўз уйларида Осиё чемпионлар лигаси плей-офф босқичи доирасида Тожикистоннинг "Истиқлол" клубини қабул қилишади.