“Локомотив-БФК” мусобақа ғолиби

Мазкур мусобақада 9 та жамоа иштирок этди.  Учрашувлар аввалига икки гуруҳда олиб борилди. Ўз гуруҳларида дастлабки икки ўринни эгаллаган жамоалар ярим финал жуфтликларини ҳосил қилишди.

Ниҳоят, учинчи ўрин учун бўлиб ўтган ўйинда “Наврўз” жамоаси ёш футболчилари “Пахтакор”чи тенқурларини йирик, 3:0 ҳисобида мағлубиятга учратишди. Ҳал қилувчи учрашув ҳам шундай ҳисобда якунланди. Ушбу беллашувда Анвар Алимов ва Алишер Рўзметовлар устозлик қилаётган  “Локомотив-БФК” футболчилари “Дўстлик” жамоаси устидан ишончли ғалабага эришиб, биринчилик ғолиби бўлди.

- Муболаға эмас, ўтган йиллар мобайнида спорт мактабимиздан қатор таниқли футболчилар етишиб чиққан, - дейди 2-сон ВБЎСМ директори Жамолиддин Абдуллаев. – Айни дамда, уларнинг баъзилари мамлакатимизнинг етакчи жамоалари сафида тўп сураётир. Ниҳоясига етган мусобақамизда уларнинг кўплаб издошларини кашф этдик. Ишончимиз комилки, бугунги биринчилигимиз мазкур ёшларимиз учун маҳорат мактаби вазифасини ўтади.

Тадбирнинг ёпилиш маросимида қатнашган Хоразм вилояти футбол федерацияси биринчи вице президенти Равшан Атажонов, “Хоразм” жамоаси бош мураббийи Вали Султонов, спорт фахрийси Озод Абдуллаев ва бошқалар мусобақанинг аҳамияти ҳақида тўхталишиб, ғолиб ва совриндорларни эришган ютуқлари билан қутлашди. Ўз навбатида шоҳсупага кўтарилган жамоалар кубок, тегишли даражадаги диплом ва совғалар билан тақдирланишди.

Икром  ХУДОЙБЕРГАНОВ.