Лестер шаҳри чемпионликка тараддуд кўрмоқда

Айни дамда "тулкилар" Премьер-лига турнир жадвалида пешқадамлик қилмоқда ва агарда улар "Олд Траффорд"да "Манчестер Юнайтед"ни мағлуб эта олишса Англия чемпионига айланишади.

"DailyMail"нинг хабар қилишича, шу кунларда Лестер шаҳрида чемпионликка тайёргарлик кўрилмоқда. Шаҳар марказидаги бинода жамоа тўпурари Жейми Варди ва жорий мавсумнинг энг яхши футболчиси Рияд Марезларнинг сурати намойиш этилмоқда.

Шаҳар мэрияси, черков ва бошқа биноларга чироқлар ёрдамида кўк ранг тушириляпти.

Қирол Ричард III ҳайкалига "Лестер Сити" шарфи боғланган.

"Хайрли тонг, Британия" кўрсатуви бошловчилари Бен Шепард ва Кейт Гарревей жума кунги дастурда "Лестер Сити"ни қўллаб, "тулкилар" рангидаги махсус парикда кўрсатувни олиб боришди.

Олдинроқ Лестер мэри шаҳар кўчаларини клуб футболчилари номи билан атамоқчи эканлигини эълон қилган эди.