Лэмпард: “Икки очко йўқотдик, бу биз учун катта дарс бўлди”

Учрашувнинг биринчи бўлимидан кейин лондонликлар 0:3 ҳисобида имкониятни бой беришаётганди.

“Рақибни ҳурмат қилган ҳолда айтаманки, биз икки очко йўқотдик. Бу ерга келаркансан, рақиб ҳар қандай хатоингдан фойдаланиб кетишини билиб турасан. Ўйингача биз стандарт вазиятлардан эҳтиёти бўлиш кераклигини айтгандик.

Ўйиндаги хатоларни олдиндан билиб бўлмайди. Бундай ҳисобдан кейин ўйинга қайтиб, характер кўрсата олгани учун жамоамни олқишлайман. Агар ҳаммасини тўғри бажарганимизда, бундай олқишлар шарт ҳам бўлмасди. 

Ҳисобга таъсир кўрсатадиган яққол хатолар бўлди. Биринчи бўлимда икки-учта голли вазиятларни ярата олдик. Ҳисоб 0:3 га ўзгарганидан кейин мезбонлар ҳимояга катта эътибор қаратишди.

Бу биз учун катта дарс бўлди. Биз яхшироқ бўлишга интиламиз. Жамоа ҳали ҳамон изланишда. Янги футболчилар жамоага мослашиб кетишига бироз вақт керак бўлади”, дея ўз фикрларини билдириб ўтди Лэмпард.