Жамшид Саидов: “Тенг курашлар остида кечган баҳсда мағлубиятга учрадик”

— Бугун тенг курашлар остида ўтган ўйинда аламли мағлубиятга учрадик, — дея сўз бошлади бухороликлар устози. — Учрашув тақдирини ягона гол ҳал қилди. Бугун ўйин дуранг ҳам бўлиши мумкин эди. Афсуски, уйга очкосиз қайтишга мажбур бўлдик.

Бутун учрашув давомида бизни уюшқоқлик билан қўллаб-қувватлаган кўпсонли бухоролик ишқибозларга раҳмат айтаман. Уларнинг далдаси биз учун жуда муҳим. Афсуски, бугун уларнинг ишончини оқлай олмаганимиздан хижолатдамиз. Агар бугун ғалаба қозонганимизда чемпионат жадвалида ҳеч бўлмаса бир поғона юқорига кўтарилиб олардик.  Аммо кураш ҳали давом этади. Олдиндаги учрашувларда фақат максимал натижани кўзлаб майдонга тушамиз.

Бугунги ўйинда рақиб жамоа таркибида Баҳриддин Ваҳобов кучли ўйин намойиш этганлигини таъкидлашни истардим. У катта маҳорат ва тажрибага эга эканлиги яна бир бор исботлади. Жамоаси учун муҳим голга муаллифлик қилди ва уч очкони тақдим этди.