"Жамоа ва мураббийга ёрдам беришнинг бир йўлини биламан – голлар уриш"

Мауро Икардининг футбол ҳақидаги тушунчалари ва унда ўзининг ўрни ҳақидаги фикри ўзига хос. 

"Ҳужумчи гол уриши, ярим ҳимоячи – ўйинни ташкил этиши, ҳимоячи эса – ҳимояланиши, дарвозабон – рақиб зарбаларини қайтариши зарур".

Бўлди. Ҳеч ким – на Спаллетти, на Манчини, Пьоли, Де Бур, Маццарри ва на Страмаччони – Маурони фикрини ўзгартира олмади. Футболчи фикрида қатъий турибди.

"Интер"да бир неча ой ишлагандан сўнг Роберто Манчини: "Агар Икарди футбол ўйнашни ҳам билганида, у чинакам феноменга айланарди". 

Ҳеч ким мураббий ўшанда нимани назарда тутгани, ёки бу шунчаки хазилмиди тушунмади.

Маурони булар заррача ҳам ташвишга солмайди. 

"Менимча, голлар ёрдамида кўп нарсага эришиш мумкин. Голлар футболда энг керакли нарсалардан бири. Мен жамоавий футболчи эмаслигим ҳақида кўп гапиришади, аммо танқидчи ва журналистлар фикри мени буткул қизиқтирмайди. Жамоа ва мураббийга ёрдам беришнинг бир йўлини биламан – голлар уриш. Ва бу ишни кичкина болакайлигимдан буён бажараман. Мен гол уришни биламан, мен гол уришим керак. Буни қандай номлаш мумкин? Миссия? Ҳа, бу менинг миссиям. Вақтида мен "Сампдория" сафида голлар урдим, олти йилдан буён "Интер"да гол уряпман. "Интер" сафида Генуедагидан 100та кўп уришга эришдим, аммо мен ҳамон ўша Мауроман. Мен хотиржам, ўз ишимни қиляпман".

- Икки турдаги етакчилар бўлишади: жим юрадиган, лекин зарур пайтда қарор қабул қила оладиган, ва майдонда ҳам, кийиниш хонасида ҳам борлиги дарров сезилиб турадиганлар. Сиз ўзингизни биринчи гуруҳга қўшасизми?
"Мен кўп бақираман. Кўпинча жамоадошларимга овозимни баландлатиб гапираман. Бу менга сардорлик боғичи берилгандан кейин бўлиб қолмади, мен аввалдан шунақаман. Олдимга аниқ мақсадлар қўяман, камроқ гапириб, ниятимга етиш учун ишлайман. Камдан-кам ҳолларда интервью бераман. Баъзан инстаграмга расм юклайман, аммо унга қандайдир изоҳлар қолдирмайман. Шахсий ҳаётимга эшик, мен истамаган инсонлар учун, доимо ёпиқ".

- Аммо сиз ҳақингизда, ҳаётингдаги воқеалар ҳақида ўрнингга гапириб берадиганлар бор. Масалан - Ванда.
"Ванда нимани гапириш ва нима қилиш кераклигини яхши билади. У жамоатчилик нима истаётганини яхши билади. У телевиденияда ўзини эркин хис қилади, кўплаб журналистлар билан яхши таниш, доим қизиққани - модалар дунёсига кирди. Ванда жуда айёр ва уни доимо бошқариб туриш зарур. Мен унга тўлиқ ишонаман. У ойнадаги пардани қанча қисмини очса, мен учун муаммо пайдо бўлмаслигини билади. Миланда мен уйдан деярли чиқмайман. Беш фарзандим ва тўртта итимиз бор. Уларга мен ва Вандани қўшинг – бутун бошли футбол жамоаси. Ва Ванда – ушбу жамоанинг тўпурари. Мени эса фақат Франческа бошқаради. Январда у тўрт ёшга тўлади. Изабелла, Бенедикто, Валентино, Константино – бутун оилам менинг танамда. Фақатгина кучукларимиз етишмаяпти".

- Танангиз татуировкалар билан тўла.
"Мен севимлиларимни нафақат юрагимда, балки теримда ҳам олиб юришни истайман. Нимани назарда тутаётганингизни тушундим. Футболга қизиқувчи миллионлаб болалар, ўз кумирларидан ўрнак олишади. Улар татуировкасиз мумкинмас деб ўйлашлари ҳам мумкин".

- Ҳа, бу уларга ёмон таъсир қилиши мумкин-ку?!
"Тўғрисини айтсам, улар бундай бўлишини истамайман. Аммо мен нима қила оламан? Бироқ узр, ким учундир ўзгара олмайман. Ёш футболчилар менга қараб ўрнак олишлари мумкинлигини тушунаман, лекин ҳар бир инсон қарорни ўзи қабул қилади. Фақатгина менда ёки бошқа бир футболчида шундай бўлгани учун, танасига татуировка чиздириш нотўғри".

- Ўз вақтида сизни Италия термасига таклиф қилмоқчи бўлишган. Ўшанда сиз она юртингиз Аргентинага қанчалик боғланиб қолганингиз ҳақида ўйлагандим.
"Мен бу таклиф ҳақида бир сония ҳам ўйлаб ўтирмаганман. Буни Италияга нисбатан ҳурматсизлик деб тушунмаслигингизни сўрайман. Италиядан умрбод қарздорман, бу мамлкатга жуда кўп жиҳатларда раҳмат айтишим зарур. Аммо мен – аргентиналикман. Оиламиз билан жуда эрта у ердан кўчиб кетган бўлсак ҳам. Ўзим Испанияда катта бўлдим, лекин мунтазам Аргентинага бориб, у ерда қолган қариндошларимизни кўриб келардим. Месси ҳам 12-13 йшида Аргентинадан кетган. Ҳозир Аргентинада яна молиявий инқироз кузатилмоқда, одамларда пул йўқ, шу сабаб улар жахлдор, кўпинча шавфқатсиз. Бока ва Ривер ўйини олдидан бўлган ишларда фақат мухлислар айбдор жмас. Бока Хунирос президенти тўғри айтди, бу бутун мамлакат учун уят – Чемпионлар Лигаси финали даражасидаги ўйинни ўтказа олмаслик. Аммо муаммонинг сабаби чуқурроқ таҳлил қилинса кўринади, бу ерда ижтимоий муаммо мавжуд".

- Сиз Месси ҳақида сўз очдингиз. У чиндан ҳам терма жамоада шу қадар таъсир кучига эгами?
"Бу ҳақида сизлар газета ва ТВда шундай дейсизлар. Мен ҳеч қачон Месси бориб мураббийга нима қилиш кераклигини ўргатганини кўрмаганман, эшитмаганман. Ишончим комил, бундай бўлмаган. Жаҳон Чемпионатига таркибни Сампаолининг ўзи танлаган.

- Истаймизми, йўқми, ҳар бир жамоада фикрига қулоқ солинадиган футболчи бўлади. Сиз ҳеч қачон клуб президентидан таркибни кучайтиришни сўрамаганмисиз?  "Ҳеч қачон. Тасаввур қилинг, мен Мессидан бизга Чемпионлар Лигасида ёрдам бериб юборишини сўролмайманку… Биз учун "Барселона"нинг ўйини натижаси муҳим, лекин ПСВ ҳақида ўйлашимиз зарур. "Барса" доим ғалаба учун майдонга тушади. Умид қиламиз, бу сафар ҳам вазият ўзгармайди".

- 29 очко, "Наполи" билан елкама-елка бораяпсизлар, "Юве" қочиб кетди, Чемпионлар Лигасида плей-офф йўлланмаси учун кураш. Шундай "Интер"ни тасаввур қилармидингиз?
"Биз кучлироқ бўлганимиз аниқ. Омадсиз старт, қатор ўйинларда очко йўқотдик. Агар ўшанда яхшироқ натижа қайд этолганимизда, ҳозир "Ювентус"га жуда яқин бўлардик. Ҳаммаси жойига тушди деб ўйлай бошлаганимизда Бергамода омадсизликка учрадик. Нима ҳам дея олардим, ўша куни улар яхшироқ ўйин кўрсатишди.

- "Интер"дан кетиш ҳақида ўйлаганмисиз?
"Мен мақсадларим ҳақида доимо аниқ гапираман. Биринчиси – "Интер" билан ЕЧЛга қатйиш. Бу вазифани бажардик. Иккинчиси – "Интер" билан қайсидир мусобақада ғолиб чиқиш. Директор, қиммат футболчиларни сотиб ололмасди, шунинг учун эркин агентлар билан шартнома тузганига қарамай, яхши жамоа туза олди". (Кулади)

- Шартнома муддати узайтирилганича йўқ. Пиппо Индзаги "Юве" сафида ўйнаркан, ҳар бир киритилган голдан сўнг келишув муддатини узайтиришни сўрарди.
"Ҳаммаси бўлади. Шунчаки вақт керак".

- Энди "Ювентус"да Роналду бор.
"Ва қаторасига еттита скудетто. Роналду келганига кўп бўлмаган бўлсада, чемпионатимизга катта фойда келтирди. Италияда фақатгина "Юве" уни сотиб олиши мумкин эди.

- Улар сизни ҳам харид қилишмоқчи эди.
"Шунга ўхшаш ниманидир эшитгандек бўлгандим. Баъзан мен охирги бўлиб бундай янгиликларни биламан. Мени фақат бир нарса – ўз ишимни яхши бажариш қизиқтиради. Футбол ўйнаш мен учун – қувочн, ғурур, мен орзу қилган касб".

- Афсонавий ҳужумчи Роберто Пруццо барча рақибларга қарши бирдек тайёрлана олмаслиги, уни фақат кучли рақибларга қарши ўйин руҳдантиришини айтганди.
"Ҳозир унақаси кетмайди. Чарчоқ билан ўйнаш мумкин, лекин иштиёқсиз – мумкин эмас. Мен доим хотиржамликни сақлаб, эътиборимни жамлашга ҳаракат қиламан".

- Айтишларича, сиз Лаутарога барча ишларида ёрдам бераётган экансиз...
"Мен шунчаки қўлимдан келганини қиляпман. Аввалига қаерга борсам, уни бирга олиб юрдим. Чунки у энди 21 ёшда ва бу ерда ҳеч кимни танимасди. Майдонда у бор кучини бериб ўйнайди, Аргентина футболида катта бўлгани сезилади, у ерда сизни ҳам тепишади, сиз ҳам зарба берасиз. VAR бу борада ҳужумчилар учун ажойиб совға бўлди деб ўйлайман. Авваллари жарима майдонида анча-мунча ишлар бўлиб кетарди ва буни ҳеч ким сезмасди. Энди ўйин нисбатан тозароқ ўтяпти".

- Голлар барча муаммони ҳал қиладими?
"Ҳа, жуда катта ёрдам беради".

- Ўйинларингизни кузатиб, сиз кўпинча ички туйғуларингизга қулоқ тутишингизни сезиш мумкин...
"Футбол менинг руҳимга сингиб кетган. Мен қаерга югуришни, рақибни қандай ортда қолдиришни ўйлайман – бу каби хислатни машғулотлар орқали пайдо этиб бўлмайди. Барчасини сониялар ҳал этиши мумкин.

- Узоқдан сирена овози эшитиляпти. Чамаси, бу "Реал" сизни излаб келмоқда.
"Менимча ҳозир бунинг учун қулай фурсат эмас. Бугунги кунда мен Италиядаги ҳаётимдан мамнунман.


Нозима Зарипова таржима қилди