Ихтиёр Каримов: "Реал" ҳам қарши ҳужум тактикаси билан "Бавария"ни енгди"
16 апр 2017 08:50
Новости

Ихтиёр Каримов: "Реал" ҳам қарши ҳужум тактикаси билан "Бавария"ни енгди"

"Шўртан" - "Пахтакор" (3:0) учрашувидан сўнг мезбонлар бош мураббийи Ихтиёр Каримов ўз фикрларини билдирди.

"Аввало бугунги баҳсда бизни қўллаб турган қашқадарёлик ва қўшни сурхондарёлик мухлисларга катта раҳмат айтмоқчиман. Бизга қарши бир неча карра Ўзбекистон чемпиони бўлган клуб ўйнади. Уларга қарши ўйиннинг охиригача ҳимояда хатосиз ўйнашга ҳаракат қилдик ва бунинг уддасидан чиқдик.

Захирадан майдонга тушган футболчиларга ўйин темпини ошириш вазифасини қўйгандим.

Кетма-кет иккита ўйинни Ўзбекистонинг номдор клубларига қарши майдонга тушдик. "Локомотив" ва "Пахтакор"ни қарши ҳужумлар эвазига мағлуб эта олдик. Кўрган бўлсангиз "Бавария" - "Реал Мадрид" учрашувида меҳмонлар ҳимояда мустаҳкам ўйнашди ва қарши ҳужумдан унумли фойдаланишди", - дейди Ихтиёр Каримов.

"Шўртан" матбуот хизмати