Ихтиёр Каримов: “Мухлисларимиз ёрдамига ишонамиз”
11 июн 2016 12:06
Новости
![](https://championat.asia/upload/storage/179811_original.jpg)
![](/upload/storage/179811_220.jpg)
Ихтиёр Каримов: “Мухлисларимиз ёрдамига ишонамиз”
Жумладан “Оқ бўрилар” жамоасида бош мураббий вазифасини вақтинчалик бажараётган Ихтиёр Каримовнинг фикрлари қуйидагича бўлди:
"Энг биринчи галда, барча жамоаларга бўлгани каби, “Олмалиқ”га нисбатан ҳам ўз ҳурматимизни билдириб қоламиз. Жамоа мамлакат футболида ўз ўрни, обрўси ва мавқеига эга.
Биз билан олмалиқликлар ўртасида ҳозирги кунга қадар кечган барча баҳслар кескин ва қизқарли курашлар остида, жанговор руҳда ўтган. Энг муҳими мухлислар завқ олишган. Ўйлайманки, бу икки жамоанинг бугунги “тўқнашуви” ҳам худди аввалги йиллардаги сценарий каби ўтади.
Натижа ҳақида гапирадиган бўлсам, барча бирдек ижобий натижа учун ҳаракат қилади. Омад ва унинг ортидан келадиган ғалаба кучлиларга кулиб боқади.
Ғузорда, ўз мухлисларимиз кўз ўнгида, уларнинг қўллаб-қувватлашлари остида тўп суришимиз жамоамизга ўзгача куч бағишлайди. Айнан мана шу куч, далда ютуғимиз йўлида муҳим аҳамият касб этади. Биз мухлисларимизга ишонамиз, улар эса бизга. Ишончни оқлаш учун эса бор кучимизни фақат ғалаба қозонишга қаратамиз.
Таркибда ҳеч қандай муаммо йўқ. Шогирдларим бугунги учрашувга жанговор ҳолда, ғалаба иштёқида шай ҳолатда туришибди. Айниқса, жисмоний тарафдан ишларимиз кўнгилдагидек бормоқда. Хабарингиз бор, яқинда мураббийлар гуруҳимизга тажрибали мутахассис, Осиё футбол Конфедерациясининг мураббийларни ўқитиш бўйича амалдаги инструктори, жисмоний тайёргарлик бўйича бир қатор халқаро курслар иштирокчиси Зоир Ҳасанов келиб қўшилди. У бундан буён “Шўртан”да футболчиларимизнинг жисмоний тайёргарлигига масъул сифатида иш олиб боради" - дейди Ихтиёр Каримов.
“Шўртан” ПФК матбуот хизмати
![AMP Logo](https://championat.asia/image/logo-amp.png)
Комментарии