Иван Бошкович: "Ҳозир саккизинчи ўриндамиз, лекин мақсадимиз юқорироқда. Бунинг учун ҳаракат қиламиз"

- Ўйин сифатидан ҳам натижадан ҳам мамнунман деб айта олмайман. Биринчи бўлимдан кейин баҳс ташаббуси биз томонда деб ўйлагандик. Биринчи бўлимда иккита гол урдик, кўплаб вазиятлар яратдик. Бу 45 дақиқада биз рақибни футболдаги барча жиҳатлар бўйича мағлуб қилдик. Иккинчи бўлимда рақиб очиқ футбол ўйнашини кутгандик. Яъни улар ҳужумда ўйнаб, бизга ҳудудлар очиб беришларини кутгандик. Биз ҳолатни назорат қилаётгандик. Яна бир нечта гол уришимиз мумкин эди, бунинг учун ҳаракат қилдик. Урилган голгача уларда зарбалар бўлгандир, лекин яққол вазиятлар бўлмади. Кўплаб зарбаларни ҳимоячилар қайтаришди. Жамоам рақибдан бир киши кам бўлиб ҳам яхши ҳимоялана олишини кўрсата олди. Бугун дарвозабонимиз яхши ўйин ўтказди, бироқ ўйин сўнгида хато қилди. Исталган инсон хато қилиши мумкин. Бундай ҳолатда футболчиларга етарлича жанговарлик кайфиятини бериш қийин. Лекин футболчилар профессионал, улар вазифаларни бажаришди. Балки биз совринли ўринлар учун кураша олмасмиз, лекин йигитларга даражани ушлаб қолиш кераклигини, ўзларини ҳурмат қилишларини айтдим. Баракалла, улар буни уддалашмоқда. Беш ўйин қолди, шундай ўйнашда давом этишимиз керак. Ҳозир саккизинчи ўриндамиз, лекин мақсадимиз юқорироқда. Бунинг учун ҳаракат қиламиз.

- Кетма-кет иккинчи ўйинни асосий таркибда ўтказган дарвозабон Шоҳруҳ Исоқов ҳақида фикрларингиз.

- Ўтган мавсумда ҳам унга умид билдиргандик. Икки йил давомида у биз билан ишламоқда. Сифатли дарвозабон, ўз имкониятини кутди. Ўтган ўйинда майдонга тушди ва вазифаларини бажарди. Унинг ўйинидан мамнунмиз. У ҳали ривожланишига ишонамиз. Унда Милан Митрович ҳамда Муҳаммадюсуф Собиров каби рақобатчилари бор ва у бу рақобатда ғолиб бўлмоқда. Келажакда унинг ишлари яхши бўлади.

- Бугун "Сўғдиёна" ғалаба қозонган бўлса-да, "Сурхон" ҳам ҳужумлар уюштирди. Бурчак зарбаларидан ташқари қанотдан кўплаб узатмалар, кросслар амалга оширилди. Бунда жамоангиз марказий ҳимоячилари рақибдан устунлигини намойиш қилиб берди. Ўйиндан олдин бу борада ҳимоячиларга қандай кўрсатмалар бергандингиз?

- Биз барчамиз бир-биримизни тахлил қилиб борамиз ва яхши ҳамда ёмон томонларимизни биламиз. Раҳмонов, Қобилов ва Иванович орқали ҳаводаги курашларда ғолиб бўлишимизни кутгандик. Уларга ҳаводаги тўп учун курашда устунлик қилишларини айтгандик, бу тушунарли ҳолат. Ўтган ўйинга қараганда таркибда ўзгаришлар бор эди. Бир киши кам бўлиб қолганимиздан кейин Зоир Жўрабоев ўйинга қўшилди. Қизилдан кейин қанотлардан узатмалар кўп бўлишини кутгандик. Рақибларни марказдан қанотга қочиришга ҳаракат қилдик. Рақибдан бир киши кам бўлиб қолгандан кейин фақатгина шу йўл орқали сифатли ҳимояланиш мумкин эди ва бу ўхшади ҳам.  Фақатгина дарвозабоннинг кичкина хатоси кузатилди. Лекин биз ўйин давомида ушбу нуқтадан кўп зарбалар берилишига йўл қўйдик. Бу борада ишлаш керак. Буни тахлил қилиб чиқамиз. Бизда бошқа ишланиши керак бўлган жиҳатларимиз кўп, лекин умумий олганда биз ўйинни назорат қилдик ва ҳақли ғалабага эришдик. Ўйин давомида рақиб биздан устунлик қилган пайтлар бўлмади. Биз сифатли жамоамиз ва қандай сифатли ҳимояланишни ҳам биламиз.

- Люпчо Дориев айни дамда тўпурарлар пойгасида Игорь Сергеев билан кураш олиб бормоқда ва мавсумни энг яхши тўпурар сифатида якунлаши мумкин. Бу ҳолатга қандай қарайсиз?

- Бизнинг футболчи мавсум тўпурари бўлиши ёқимли ҳолат бўларди. Лекин у профессионал ва жамоа манфаати биринчи ўринда эканлигини яхши билади. Мен ҳам ҳужумчи бўлганман ва менга ҳам кўпроқ гол уриш босими бўлса, ишлар ўхшамасди. Шу сабабли футболчини босимга қўйиш керак эмас. У ўз ишини қилсин ва жамоага эътибор қаратсин. Умид қиламанки у кўп гол ура олади. Олдиндаги 5та ўйинда 15 очко жамғара олишимизга ишонаман. Ёмон ўтаётган ушбу мавсумнинг картинасини бироз бўлса-да, яхшилай олдик. Чемпионатда анчагина кечикдик, бироқ умумий ўйин сифатидан мамнунман. Натижалар эса доим ҳам яхши бўлгани йўқ. Кубокнинг қўлдан чиққани эса ачинарли ҳолат бўлди. Энди фақатгина келажакни ўйлаш, ортга қайтмаслик керак. Энди "Бухоро" билан ўйинга тайёрланишимиз керак. Кейин кичик танаффус бўлади. Жамоада сифатли футболчилар кўп, улар сифатли ўйин кўрсата олишади. Таслим бўлмаймиз ва фақатгина олдинга ҳаракатланамиз.