“Истиқлол”да нима гаплар?

“Қувасой таъмир қурилиш” маъсуляти чекланган жамияти ҳузуридаги “Истиқлол” футбол жамоаси ўтиш мусобақаларида муваффақиятли қатнашиб 2017-йилги мавсумда мамлакат футбол чемпионатининг Биринчи лигасида қатнашиш ҳуқуқини қўлга киритди.

Ўтиш ўйинлари Сирдарё вилоятининг Янгиер шаҳар стадионларида бўлиб ўтди. Мусобақаларда “Истиқлол” билан бирга  Андижондан “Шаҳрихон”, Тошкентдан “Бунёдкор-2”, Сирдарё вилоятидан “Боёвут” ва “Янгиер”, Тошкент вилоятидан “Ангрен” каби жамоалари иштирок этишди.

Шу кунларда жамоа янги мавсумга ва 26 январдан бошланадиган “Ҳоким Кубоги-2017” турнирига қизғин хозирлик кўришмоқда. Биз эса “Истиқлол” жамоаси бош мураббийи Наиль Гумановнинг турнир олди фикрлари билан қизиқдик.

– Ёш жамоамиз билан бирга бизга билдирилган ишончни оқлаш учун мусобақанинг биринчи йилида етакчи лигада мустаҳкамланиб олиш, ёш иқтидорларни танлаш ва тарбиялаш, кўплаб мухлисларни чиройли ва натижали ўйинларимиз билан қувонтиришга ҳаракат қиламиз. Бунинг учун биринчи ўринда Фарғона вилояти “Ҳоким Кубоги”да нималарга қодир эканлигимизни исботлашимиз керак бўлади. Умуман олганда жамоанинг руҳи баланддир ва ғолибона юришларга тайёрмиз, – деди фарғоналиклар устози.

Баҳодир Эргашев