Испания. 20-тур Превьюси

17 январь. "Малага" - "Валенсия". 00:59
"Малага"нинг бу мавсумдаги ишлари унчалик юришмаяпти. 14-поғонани банд этиб турган "Малага" охирги учрашувларда биттадан кўп гол ура олмаяпти. Сўнгги етти учрашувда беш очко мақтанишга арзийдиган натижа эмас албатта.

Навбатдаги рақиб "Валенсия" эса сўнгги учрашувни инобатга олмаганда қониқарли натижалар қайд этмоқда. 8-поғонада бораётган валенсияликлар еврокубокларда иштирок этиш учун кураш олиб боришмоқда. Ўзаро ўйинлар натижаларига юзлансак қизиқ ҳолатга дуч келамиз. Сабаби, ушбу жамоаларнинг қай бири ғала қозонмасин, одатда албатта йирик натижа қайд этилади.

Сўнгги олти ўйинга эътибор қаратсак "Валенсия"нинг 4 та, "Малага"нинг 2 та ғалаба қозонганининг гувоҳи бўламиз.

Яна бир қизиқ ҳолат, клублар навбати билан икки мартадан зафар қучишни одат қилганлар. Балки бу тасодифдир, лекин мана 4 йилдирки ушбу анъана сақланиб келмоқда.

Эндиги навбат "Малага"да. Лекин жамоаларнинг ҳозирги ҳолатидан келиб чиқадиган бўлсак, аниқ бир нима дейиш мушкул вазифа. Ҳар икки жамоанинг асосий ўйинчилари сафда.  

Тўпурарлар - Роке Санта Крус 4 та ("Малага"). Жонас 8 та ("Валенсия")

П.С: Эслатиб ўтамиз, ушбу учрашув ўз ниҳоясига етиб бўлган. Унда томонлар муроса йўлини танлашди 0:0.  

18 январь. Бетис : Реал Мадрид. 20:00

Мезбонлар охирги баҳсда мағлуб бўлган бўлсаларда, жамоа тўпурари Хорхе Молина гол уришга муваффақ бўлди. Асосий қуроли гол урганидан қувонган Хуан Карлос Гарридо келажакга ишонч билан боқмоқда ва хаттоки "Реал Мадрид" билан бўладиган баҳсда ҳам очко "юлиб" олишга уруниб кўринишларини таъкидлаб ўтди.

Тўғри мусобақа жадвалига қарасак, "Реал"нинг очко йўқотиши учун қандайдир мўжиза керакдек. Лекин бу - футбол. Унда барчаси майдонда ҳал этилади.

Ўзаро ўйинлар статистикаси ҳам мадридликларнинг катта устунлигини кўрамиз. Умумий ҳисобда 37 та учрашув ўтказилган бўлса, шуларнинг фақатгина 7 тасида "бодринглар" ғалаба қозона олганлар. Яна 12 тўқнашувда дурранг натижа қайд этилган.

"Бетис" 2012 йилнинг 25 ноябридан бери "Реал Мадрид"ни юта олмаяпти. Чемпионатда сўнгги марта 11 тур аввал зафар қучган. Табиийки футболчилар ҳам, жамоа мухлислари ҳам ғалаба нашидасини соғиниб қолишган. Агарда у "Реал Мадрид"га қарши учрашувда амалга ошса, нур устига аъло нур бўлади.

Албатта "Бетис" тарафдорлари учун ва... Ва албатта "Барселона" ва "Атлетико" учун. Мезбонлар турнир жадвалининг сўнгги поғонасини ҳали бери ҳеч кимга бермайдиганга ўхшайди.

19 та учрашувда 16 гол уриш унча-мунча клубнинг "қўли"дан келмайди. Шу ўринда мадридликлар мухлисларини ранжитаётган бир нарса, дарвозабон ва гол ўтказиб юбориш муаммосидир. "Бетис"га қарши ўйинда Диего Лопес ўз дарвозасини қуруқ сақлай олармикан? Ҳар ҳолда ўша ёмонланаётган Лопес клуб тарихидаги энг яхши старт (Йил бошида кетма-кет ғалаба қозониш бўйича "Реал" тарихидаги энг яхши старт) амалга оширилишида озми-кўпми ўз ҳиссасини қўшди.

Эътиборлиси жамоа нафақат ютқазмади балки, янги йилдаги учрашувларда бирорта ҳам гол ўтказиб юбормади. Жамоа қишги трансфер ойнасида футболчи сотиб олмоқчи эмас. Лекин клуб футболчиларига таклифлар етарлича. Уларнинг бири Моратадир. Шунингдек, “Арсенал”, “Тоттенхэм”, “Ювентус” ва “Боруссия” қизиқаётган ушбу футболчи навбатдаги баҳсда иштирок этиши катта сўроқ остида. Хабарингиз бўлса керак, Альваро кубок баҳсида жароҳат олди ва ўйинни эртароқ якунлади.

"Бетис"га ушбу ўйинда Альваро Вадилло, Хави Торрес, Ноно ёрдам бера олмайдилар.
"Реал" таркибида Сами Хедира ва Рафаел Варан майдонга туша олмайди.
Тўпурарлар - Хорхе Молина 7 та ("Бетис"). Криштиану Роналду 20 та ("Реал Мадрид").
   

18 январь. "Эльче" - "Райо Вальекано". 22:00
Фран Эскриба бошчилигади "Эльче" сўнгги ўн бир учрашувда ғалаба қозонмаган. Лекин "Эльче" учун охирги турда "Севилья"га қарши ўйиндаги дуранг ҳам ёмон натижа эмас.

Жамоа  17-поғонани банд этиб турибди ва мағлубиятга учрашга ҳаққи йўқ. Чунки унинг ортидан келаётган "Вальядолид" ва навбатдаги учрашувдаги бевосита рақиб "Райо Вальекано" 16 тадан очко жамғарган ва изма-из тақиб келишмоқда.

"Райо Вальекано" ўз навбатида охирги баҳсни ўз фойдасига ҳал эта олган. "Хетафе"га қарши ўйинда Буэнонинг голи меҳмонларга ғалабани тақдим этган. Ўзаро ўйинларда катта устунлик мезбонлар томонида. 11 учрашувнинг 8 тасида "Эльче" футболчиларининг қўли баланд келган ва фақатгина 1 та тўқнашувда райоликлар ғалабани ўзлариники қилиб олганлар.

Учрашувда иштирок эта олмайдиганлар: "Эльче" - Кристиан Сапунару, Ману Геррера, Альваро Хименез. "Райо Вальекано" - Алберто Переа, Хоакин Ларривей, Себастьян Фернандес, Хосе Карлос.
Тўпурарлар - "Эльче" - Ричмонд Боакье 3 та, "Райо Вальекано" - Алберто Буено.

18 январь. "Гранада" - "Осасуна". 23:59
"Гранада" охирги ўйинларда фақат йирик натижалар қайд этилишида қатнашмоқда. "Гранада" - "Вальядолид" - 4:0, "Алмерия" - "Гранада" - 3:0, "Гранада" - "Реал Сосьедад" - 1:3. Жамоа ҳужумкор ўйинни ҳуш кўради, лекин ўз навбатида ҳимояни ҳам унутиб қўйиш одати бор.

"Бўлса бўлди, бўлмаса йўқ" дегандек. Албатта бу ҳазил. Лекин клуб натижалари шундай ҳаёлга боришга мажбур қилади. "Вальядолид"ни қабул қилган гранадаликлардан ҳеч ким бундай голлар шоусини кутмаганди.

Мурильо, Ресио ва Ал-Арабининг ҳаракатлари эвазига жамоа мухлислари уйларига мамнун қайтишди.

Ўзаро ўйинларнинг охириги учтасида фақат "Гранада"нинг қўли баланд келган.

Учрашувда иштирок эта олмайдиганлар: "Гранада" - Дани Бенитес, Мурильо. "Осасуна" - Мануел, Сиси, Нино, Андрес Фернандес.
Тўпурарлар - Юсуф Ал-Араби 7 та ("Гранада"), Ориоль Риера 7 та ("Осасуна").
 
19 январь. "Эспаньол" - "Сельта". 02:00
Хавьер Агирре қўл остидаги "Эспаньол" "Олтин тўп" соҳиби Криштиану Роналдуни ушлаб қола олдику, аммо Пепе гол уриб қўйиши мумкинлигини инобатга олмаган эди. Айнан шу сабаб "Қироллик клуби" учун жуда оғир кечган ўйинда кичик ҳисобда мағлуб бўлди.

"Сельта" эса "Валенсия"ни қабул қилиб кўпчилик кутмаган жойда ғала қозонди. Рақиб таркибидаги Парехонинг голига мезбонлар таркибида Шарлес икки бор жавоб бера олди.

"Эспаньол" 12-поғонада, "Сельта" эса 15-ўринда бормоқда ва жамоаларни бор йўғи 3 очко ажратиб турибди. Ўзаро ўйиндаги ғалаба "Сельта" учун рақибга етиб олиш имконини беради. Айнан шу сабаб меҳмонда бўлишига қарамай "Сельта" олға интилади.

Бунинг устига ўзаро ўйинларда "Эспаньол"нинг икки ғалабасидан сўнг, "Сельта" яна иккита ўйинда мағлуб бўлмасликнинг иложини топди. Бир ғалаба ва дурангдан сўнг рақибдан ҳайиқиш бироз чекинган бўлса ажаб эмас.
Жамоалар таркибларида жароҳат туфайли учрашувда иштирок эта олмайдиганлар йўқ.
Тўпурарлар - Серхио Гарсия 7 та ("Эспаньол") Шарлес 7 та ("Сельта").

19 январь. "Хетафе" : "Реал Сосьедад". 16:00
Бу жамоалар 13 маротаба тўқнаш келганлар ва уларнинг 5 тасида "Хетафе" зафар қучган, 3 тасида "Реал Сосьедад" ва яна 5 та учрашувда ғолиб номи аниқланмаган. "Хетафе" кучли ўнликка кириш ҳаракатида юрган бир паллада, сосьедадликлар евро кубоклар хақида ўй суришмоқда.

"Вильяреал"га қарши бўлиб ўтган сўнгги ўйинни инобатга олмасакб жамоанинг натижалари ёмон эмас. Ҳужумга яқинроқ бўлган футболчиларнинг самарали ўйини, ҳимоядагиларга ҳам эркинлик яратиб бермоқда. Луис Гарсия қўл остидаги "Хетафе" ўз майдонида очколарни шунчаки улашиб бермайдиган ва чинакамига кураш олиб борувчи жамоа айланди.

Лекин навбатдаги рақиб ҳам анойилардан эмас, жамоа таркибида Карлос Вела, Антони Гризман, Эстебан Гранеродек футболчилар бор жамоанинг ҳужумларини тўхтатиб қолишнинг ўзи бўлмайди.

Учрашувда иштирок эта олмайдиганлар: "Хетафе" - Москуера, Мичел "Реал Сосьедад" - Де ла Белья, Зурутуза, Эстебан Гранеро, Инйиго Мартинез.
Тўпурарлар - Антони Гризман 12 та ("Реал Сосьедад"). Педро Леон 5та ("Хетафе")

19 январь. "Леванте" - "Барселона". 23:00

Лионель Месси қайтди! Бугун кўпчилик футбол мухлисларининг тилида шу гап. Месси қайтди! Дарҳақиқат Лионель узоқ вақт катта футболдан четга қолганига қарамай, ўзига хос ўйин услубини эсдан чиқариб қўймаган. Буни унинг ўйини ҳам тасдиқлаб турибди. "Хетафе"га қарши кубок баҳсида Лео дублга эришди. Бундан ташқари яна бир нечта қулай вазиятлари ҳам бўлган "Барса" футболчиларига шу ҳисоб ҳам етарли эди. Икки ўйин натижасига кўра 4:0, "Барселона" кейинги босқичга йўл олди.

Клуб аргентиналиксиз ҳам голлар ёғдусини тақдим этаётганди. Сўнгги "Атлетико"га қарши ўйингача бўлган 3 та баҳсда 11 та гол! Бу жамоанинг ҳужумдаги салоҳиятини кўрсатиб беради. Лекин "Барселона"нинг қандай кучга эга эканлиги тўғрисида ортиқча гап-сўзнинг ҳожати йўқ.

"Матрасчилар" билан бўлган баҳсдан (0:0) сўнг, ҳеч бир жамоа олдинга ўтиб ололмади. Ўзаро ўйиндаги дуранг фақатгина "Реал Мадрид" фойдасига ишлади десак муболаға бўлмаса керак. Энди яна жамолар ўз йўллари билан чемпионлик сари интилишади. Орадаги фарқ камайгани сабаб, "Реал" ҳам ўз рақибларининг қоқилишини кутиб туради.

Ўзаро ўйинлардаги натижалар бўйича табиийки каталонияликлар устунлик қилишмоқда. Қизиқи шуки, жамоаларнинг охирги учрашувида "Барса" рақиби дарвозасига жавобсиз 7 та гол урган. Бу сафар ҳам йирик ғалаба насиб этадими, ёки кутилмаганда сенсация қайд этиладими.

Бунга ишониш қийин. Лекин Ла Лигада ҳаммаси бўлиши мумкин. Балки йуқ дерсиз, аммо аввалги турлардаги натижаларга бир эътибор беринг, "Барса" ҳам, "Реал" ва "Атлетико" ҳам унчалик кучли бўлмаган рақибларга қарши ўйинда очко йўқотганлар.

"Леванте" ўзининг охирги учрашувида кичик, 1:0 ҳисобида ғалабага эришди.

Бироқ, "Малага" ва "Барса"нинг "бирозгина" фарқи бор, бизнинг наздимизда. Кўрамиз, аслида қандай бўларкин? Кутилган натижа ва воқеаларми ёки...   

Учрашувда иштирок эта олмайдиганлар: "Леванте" - Давид Наварро, Баба Диавара, Давид Баррал. "Барселона" - Ойер, Дани Алвес.
Тўпурарлар - Давид Барраль 4 та ("Леванте"), Педро ва Алексис Санчес 11 тадан ("Барселона")