Инчеондан ёзамиз. 5-кун кундалиги. “Nikon”га раҳмат!

Гуруҳда биринчи ўринни олсак ким тушади, ундан кейин ким деган кўплаб саволларни эшитяпман. Биз чемпион бўлиш учун келдикми, фарқи нима - унда ким тушиши, барибир ўйнаш керак-ку дейман.

Медиа марказ менга “Қайнар хумча”ни эслатиб юборяпти. Осиё катта қитъа эмасми, нақд 9700 нафар ОАВ ходими мусобақада иштирок этиш истагини билдирган. Энди мен ёлғиз эмасман. Тошкентдан устозим Анвар ака Илёсов келдилар. Улардан ташқари мен таниган МТРК тасвирчиси Рамиз ака ҳам. Ўзбекистон Ахборот агентлигидан Меҳрибон. Хуллас сал кўпайдик. Энди биз очилиш маросимига кириш ҳуқуқини берувчи чиптани қўлга киритишимиз керак эди. Афсуски, Хитой ва Япония медиа соҳасида биздан анча илгарилаб кетмаганми, аллақачон очилиш маросими учун чипталарни банд қилиб бўлган эканлар. Бошқа мусобақалардан фарқли равишда мазкур Осиё ўйинларида давлатлар учун квоталар ажратилмаган экан. Биздан ташқари қозоғистонлик ҳамкасбларимиз ҳам “ринг”га чиқдилар. Улардан 16 нафар киши бўлиб, бор-йўғи битта фотомухбир эпчиллик қилган ҳолда ўзи учун чипта олган эди. 

• Медиа марказда иш авжида
  

Чипта олиш имкониятимиз 100дан бир бўлиб турган пайтда Анвар ака Лондон олимпиадасида ишлаган бир танишини учратиб қолди. У киши бу ерда фото департамент бошқарувчиларидан экан. Муаммо ҳақида айтган ҳам эдикки, 2 дақиқага қолмай чиптага эга бўлдик. Анвар ака Сидней, Афина, Пекин ва Лондон олимпиадаларида ишлаган. Шубҳасиз, бундай пайтларда тажриба ва танишлар иш беради. Мен ҳам имкон қадар таниш орттиряпман. Келажакда асқотиши аниқ. 

Эртага (кундалик 18 сентябрь учун) очилиш маросимида иштирок этаман. Бу фаолиятимдаги иккинчи катта очилиш ўйини бўлади. Биринчиси, Дохадаги Осиё Кубоги эди. Яқинда Нанкинда бўлиб ўтган ўсмирлар олимпиадасининг очилиш маросими мени лол қолдирган эди. Очилиш маросимида Шарқдаги рақобатни кўрсам ажаб эмас. Кейин бугун катта саҳнага Псай (PSY) чиқар экан. Ҳамма “Опа Гангам Стайл”га рақсга тушиб кетмаса бўлди. 

Кеча спорт шаҳарчасида Ватанимиз байроғини кўтариш маросими ўтказилди. Ўзбекистон – Бангладеш ўйини муносабати билан тадбирда иштирок эта олмасдим. Шерикларим тадбирга, мен эса 40 дақиқалик йўл бўлган “Ансан” стадиони томон йўлга чиқдим. Борганимда Афғонистон – Гонконг учрашувининг биринчи бўлими тугаб бўлганди. Бу ўйин ҳақида кеча ёзиб ўтдим. Ҳар ўйин сайин стадионга ташриф буюраётган мухлисларимиз сони ошиб бораяпти. Бу сафар делегациямиз вакиллари ҳам бор эди. Ўйин биз кутган натижа билан якунига етди. Жамоа билан автобусда бирга қайтар эканман, телефонлардан танғир-тунғур эмас, ҳақиқий этни жимирадиган ўзбекча қўшиқларни эшитиб келдик. Сафарда шундай йўл билан Ўзбекистонни эслаш мумкин.

• Байроқ кўтариш маросимида 100 нафардан ортиқ спортчиларимиз иштирок этдилар. Фото: Анвар Илёсов
  

Кўпчилик фотомақоладаги комик гапларга кулаётганини айтишяпти. Демак, қайсидир маънода футболчиларимизнинг кайфиятини кўтара оляпмиз. 

20 сентябрдан бошлаб барча мусобақаларга старт берилади. Иш қизигандан қизиса керак, аммо мен асосий эътиборни футболга қаратаман. Бу ердаги матбуотларда Ўзбекистон ҳақида деярли ҳеч ким ёзмайди. Ҳамма ўзининг спортчилари билан овора. 

Ўйиндан кейин спорт шаҳарчасида қоладиган бўлдим. Шу куни Тошкентдан учиб келган раҳбарият вакиллари, Ойбек Касимов (МОҚ бош котиби) ва Мурод Алиев (Маданият ва спорт ишлари вазирининг спорт бўйича биринчи ўринбосари) спортчиларимизнинг шароити билан яқиндан танишиб чиқдилар. Улар билан суҳбатда бўлиб, омад тиладилар. 

Мен эса тунгача терма жамоамиз оператори Жамол ака билан суҳбатлашиб чиқдим. Сал аввал дилни хира қиладиган СМС келганди. Ҳа энди иш бор жойда хато бўлади-да, майли жазони барибир биз бермаймиз-ку! Хато қилмасликнинг бир йўли бор, у ҳам бўлса ишламаслик. Аммо қонинг қайнаб турганида ишлаб олмасанг, ҳассага таянганингда сени биров ҳурмат қилармиди? Сиз ўқувчилардан ҳам шуни илтимос қилардим, буни ётиғи билан тушунтирсангиз бўлади. Биласиз, биз Сизлар учун ишлаймиз. Ортиғи керак эмас.

"Ким у Жамол ака?" деяётганларга. Мана Жамол ака 

Жамол ака билан анча гаплашиб ўтирар эканман, тўғрисини айтсам, катта ҳаётий сабоқ олдим. Эскиларнинг яхши бир гапи бор, “Сендан битта бўлса ҳам кўп кўйлак йиртган”, деган. Баъзан бировга тўғри маънода гапирсанг, менга ақл ўргатяпти деган фикрга боради ёки руҳий зарба дейди. Йўқ, асло ундай эмас. Биз инсонмиз, инсон жамики жонзотлар ичидаги энг ақллиси. Ақлни эса ақл билан ишлатишимиз керак. Омон бўлинг, эртага очилиш маросимидан репортаж.

18 сентябрь, Жанубий Корея, Инчеон

Нодирхўжа Юлдашев