Илҳом Мўминжонов: "Мағлубиятга лойиқ эмасдик"

- Бугунги ўйинда мағлубиятга лойиқ эмасдик. "Қизилқум" жамоасида иккита вазият бўлди ва бундан навоийликлар самарали фойдаланиб, гол уришди. Иккинчи бўлимда ўтказиб юборган голимиз бизга оғир ботди. Йигитлар яхши ўйин намойиш қилишди, берилган кўрсатмаларимни яхши бажаришди, аммо омад бизга кулиб боқмади. Биринчи бўлимда ҳисоб тенглигида бизда голга тортадиган хавфли вазият бўлганди. Мансур Саидов бу ҳолатда тўпни Неманья Йовановичга оширишни афзал билди. Шу вазиятни биз голга айлантиришимиз керак эди.

Бу футбол... Майдон текис, тўп юмалоқ. Аввал ҳам таъкидлаганимдек жамоага таклиф этилган футболчилардан фахрланаман. Мен чақирган ўйинчилар ўйиндан-ўйинга чиройли футбол намойиш этиб, мухлисларимизга ғалабаларни тортиқ этишади.

Клубга жалб этилганлар билан ҳали кўп ютуқларга эришамиз. Бугун бизга омад етишмади. Ўйин тугашига 15 дақиқа қолганида тўпни назорат қилиш бизда бўлгани ва рақибга босим ўтказиш мақсадида Мансур Саидов ўрнига Рўзимбой Аҳмедовни майдонга туширдим. Икки ҳужумчи билан ўйнаш услубига ўтдик. Камчиликларимиздан тўғри хулоса чиқариб, кейинги беллашувга тайёргарлик кўрамиз. "Қизилқум" майдони бугун идеал холатда экан. Мамлакатимиздаги ҳар бир ўйингоҳ майдонини шундай бўлишини истардим, - дейди Мўминжонов.