Игорь Шквирин: "Кураш сўнгги турга қадар давом этади"

"АГМК адолатли ғалабага эришди. Футболчиларнинг маҳорати ва жамоавийлиги кўринди. Шундай бўлишини билардик ва футболчиларни огоҳлантириб ҳам қўйгандик. Яна бир бор олмалиқликларни табриклайман", – Игорь Шквирин.

- Фозил Мусаевнинг ҳимояда ўйнагани ўзини оқладими? Унинг ўйинига қандай баҳо берасиз?

- Фозил яхши ўйин намойиш қилди. Бу қарорга келиш аслида осон бўлгани йўқ. Ҳимоямиз марказида муаммолар бор эди. Тоштемировнинг соғлиғида ҳам муаммолар пайдо бўлди. Шу сабабли уни марказий ҳимояга қўйдик. Биринчи пасларни қабул қила оладиган футболчилар доимо ҳимояда ўйнай олишган. Балки у ҳаводаги курашларда унчалик яхши эмасдир, аммо унинг паслари яхши. Эҳтимол, бу катта устунлик бермас, бироқ шу орқали ўзимизни яхши ҳис қилдик.

- Турнир жадвалининг қуйи қисмида бораётган жамоалар орасида кураш жиддий давом этяпти. Имкониятларни қандай баҳолайсиз?

- Бу сўнгги турга қадар давом этади. Бизнинг тақвимимиз ҳам осон эмас, рақибларга ҳам ғалаба керак. Ҳолатни яхшилашга ҳаракат қиламиз. Мағлуб бўлганимиз ёқимли эмас, лекин руҳимизни тушириб юбормаймиз.