Гвардиолага ёрдамга келган ўзбек

Хосеп Гвардиола асосий таркибда кўпроқ иккинчи таркиб футболчиларини туширди, ҳамюртимиз Абдуқодир захирада қолдирилди. Учрашувнинг 16-дақиқасида "шаҳарликлар"нинг янги хариди бўлган Нико Гонсалес қўпол хатога йўл қўйди ва мезбонлар майдон марказидан "Сити" дарвозасини нишонга олишди. Тўп дарвоза тўсинига тегиб майдонга қайтди ва дарвозабон Ортеганинг оёқларига тегиб дарвозадан жой олди - 1:0. 60 млн еврога сотиб олинган Нико 22-дақиқада жароҳат сабаб алмаштирилди. Жуда ҳам омадсиз дебют.

Гвардиола 2-бўлим аввалида бирданига ҳар иккала марказий ҳимоячиларни ўзгартирди. Диаш ва Рейс ўрнига Стоунз ва Ҳусанов туширилди. Абдуқодир майдонга тушгандан кейин бир эпизодда жамоасини муқаррар голдан қутқариб қолди. Ўнг қанотдан узатилган тўп ўзбекистонлик ҳимоячи бўлмаганда деярли бўш дарвоза қаршисига чиқиб бораётган мезбонлар вакилига бориб тушарди.

Кейин эса 56-дақиқада Рико Льюиснинг кучли зарбаси Абдуқодирнинг елкасига тегиб рақиб дарвозасидан жой олди - 1:1. Жуда керакли паллада ўзбек йигити Пеп ва унинг жамоасига ёрдамга келди. Бунақасини яқингача ҳам фақат орзу қилиш мумкин эди. Ҳозир эса бу ҳақиқат.

Кейинчалик 79-дақиқада Грилишнинг заргарона пасидан кейин Кевин де Брюйне "Сити"га ғалаба келтирган голни урди. Шу тариқа, "Манчестер Сити" Англия кубогининг 1/8 финал босқичига йўл олди.

Гвардиола биринчи 45 дақиқаликдан кейин асосий таркиб футболчиларини бирин кетин майдонга ташлаб жиддийлашди, акс ҳолда қийналиб қолиши мумкинлигини сезди. Ҳусанов гол урганидан кейин яна бир эпизодда "Сити" дарвозаси томон кетаётган тўпни қайтариб қолди, 2 марта тезлигини намойиш этишга ҳам улгурди. "Flashscore" портали Ҳусанов, Де Брюйне ва Орайлиларни бир хил 7.9 баллга баҳолади. Улар ўйиндаги энг юқори балл олганлар бўлишди.

"Манчестер Сити" навбатдаги ўйинини 11 февраль куни тунда "Реал Мадрид"га қарши "Этихад стэдиум"да ўтказади. Кўпчилик тушиниб турганидек, "Сити"нинг икки асосий марказий ҳимоячилари Рубен Диаш ва Жон Стоунз. Лекин, бугунги жуда ишончли ўйини, камига Диаш эндигина жароҳатдан қутулиб сафга қайтганини инобатга олиб негадир Абдуқодир "Реал"га қарши ҳам ўйнайди деб ўйлаяпман. Асосий таркибдами ёки бугунгидек 2-бўлимдами, фарқи йўқ. Муҳими, Ҳусанов майдонга тушиши ва Винисиус, Мбаппе, Родриго каби мега юлдузлардан тўпни олиб қўйиши. Ўшанда бутун дунё ўзбек ҳимоячисининг кучини ҳис қиларди. Дарвоқе, Ҳусанов АПЛ жамоаси таркибида гол урган биринчи ўзбек футболчиси бўлиб тарихга ҳам кирди. Олға, Ҳусанов!