Гавининг "Барса" билан янги шартномаси ҳали расмийлаштирилмаган – у оширилган маош олмайди

"Барселона" ҳали ҳам Гавини асосий таркиб футболчиси сифатида рўйхатдан ўтказмаган.

"Барселона" сентябрь ойида испаниялик билан шартномани 2026 йилгача узайтирганини, янги келишув шартларига кўра, унинг маоши оширилишини эълон қилганди.

Декабр ойида маълум бўлишича, каталонияликлар клубдаги маошлар харажати ошириб юборилгани учун Гавини асосий таркибга кирита олмаган, шу сабаб у 6-рақамда ўйнашни истаса-да, 30-рақамда тўп тепмоқда.

"Mundo Deportivo" хабарига кўра, бу масала ҳалигача ҳал этилмаган. 18 ёшли хавбекнинг шартномаси ҳали Ла Лигада қайд этилмаган, шу сабаб Гави янги маош олмайди ва асосий таркиб ўйинчисининг рақамини ололмайди.

Бироқ футболчи ва унинг агенти бунга парво қилмаяпти – улар клубга тўлиқ ишонади.