“Фейеноорд” вакиллари “Бунёдкор”да бўлишди

Бугун “Бунёдкор” стадионига “Фейеноорд” футбол клуби менежери жаноб Гидо Даниэль Вадер ҳамда ҳалқаро алоқаларни ривожлантириш мутахассиси Боэль Мелвин Жулиан ташриф буюрди. Голландиялик меҳмонлар даставвал “Бунёдкор” футбол мактабида яратилган шароитлар билан танишишди. Уларга Сергей Лушчан хамроҳлик қилди.

Шундан сўнг “Фейеноорд” вакиллари “Бунёдкор” стадионини кўздан кечиришди. “Алвон лолалар” юртидан ташриф буюрган меҳмонлар улкан спорт иншоати билан танишар эканлар, очиғи бу каби йирик спорт мажмуаси Европанинг кўзга кўринган жойларида ҳам йўқ эканлигини таъкидлаб ўтишди. Шунингдек, “Бунёдкор” сувини ичишиб, унинг ширин ва мусаффо эканлигига юқори баҳо беришди.

- Қишки йиғинларимиз доирасида “Бунёдкор” жамоаси билан Дубай шаҳрида назорат учрашуви ўтказган эдик. Ўша учрашув 1:1 ҳисобида якун топгани эсимда. Бу ерда яратилган шароитлар билан танишар эканмиз, келажакда яна ўртоқлик учрашуви ўтказиш бўйича ҳамма имкониятлар борлигига амин бўлдим. “Бунёдкор” стадиони дизайни ва ундаги имкониятларни кўриб ҳайратландим, - дейди “Фейеноорд” клуби менежери Гидо Даниэль Вадер.

Голландиялик меҳмонлар “Бунёдкор” стадиони дастхатлар китобига ўзларининг дил изҳорларини ёзиб қолдиришди.