Февзи Давлетов: Футболчиларнинг ҳаракатидан қониқдик, уларга ортиқча эътирозим йўқ

Умуман олганда, ўйиндан аввал тахмин қилганимиздек қийин баҳс бўлди. Рақиб анча кучли. Биринчи бўлимда олдинда бораётган вақтимизда бир нечта керак бўлмаган хатоларга йўл қўйдик. Болаларнинг ҳаракатидан қониқдик, уларга ортиқча эътирозим йўқ. Сўнгги голда жарима майдончамизнинг ичида футболчимиз йиқилиб тушди ва хато эвазига гол ўтказиб юбордик. Қолган вазиятларда футболчиларимиз яхши ҳаракат қилишди. Қийин мавсумда футболчилар яхши ҳаракат қилишди ва уларга бу учун миннатдорчилик билдираман.

Кубок учун тўртта жамоа қолди. Сизнингча қайси жамоанинг чемпион бўлишга имконияти кўпроқ?

Қуръа ташланмагунга қадар нимадир дея олмайман. Қуръадан сўнг барчаси ҳал бўлади. Бироқ «Пахтакор» финалга йўл олса керак. Иккинчи финалчини эса қуръадан сўнг тахмин қилсак бўлади.

«Металлург» учун мавсум якунланди. Жамоанинг келаси йил учун режалари қандай? Қайси позицияларни кучайтиришни режа қилгансизлар?

Ҳозирча барча ишлар олиб борилмоқда. Албатта кейинги мавсум учун янги ўйинчилар келади. Лекин биринчи навбатда якунланган мавсумда қилинган ишларни кўриб чиқиб, хато қилинган жойларни кўриб олишимиз керак.

Ўзбекистонда футболчилар қишда расмий ўйинларда иштирок этишмасди. Асосан ўртоқлик ўйинларида майдонга тушишган. Шуни инобатга олган ҳолда, футболчиларни тайёрлаш қанчалик қийин кечмоқда?

Тўғри қишда асосан машғулотлар олиб борардик. Кубок баҳслари чўзилиб кетди ва шу сабабли футболчиларни тайёрлаш анча қийин кечди.