Эрон кетма-кет тўртинчи марта ғалаба қозонишни мақсад қилмоқда

Эрон спортини ёритадиган сайтлардан бири tehrantimes.com нинг ёзишича, бу ўйинда эронликлар фақат ғалабани мақсад қилишмоқда.

Бу борада сайт шундай ёзган: "Эрон миллий терма жамоаси Жаҳон чемпионати олдидан энг сўнгги тайёргарликни шанба куни Ўзбекистонга қарши баҳс билан бошлайди. Бунгача иккала жамоа ўзаро 8 марта ўйнаган. Эрон олти бор зафар қучган бўлса, Ўзбекистон бир марта ютган. Шунингдек, битта ўйинда дуранг қайд этилган".

"Эрон Ўзбекистонга қарши охирги уч ўйинда ғалабага эришган. Эртага кетма-кет тўртинчи ғалабани нишонлаш ниятидамиз. Терма жамоа Ўзбекистон билан баҳсдан сўнг 29 май куни Туркия билан куч синашади. Ҳар иккала учрашув бош мураббий Карлуш Кейруш учун 23талик таркибни аниқлаб олишда хизмат қилади".

"Ҳозир терма жамоа лагерида 35 нафар футболчи шуғулланмоқда. Кейруш ЖЧга борадиган якуний рўйхатни 3 июнь куни маълум қилади. "Озоди" стадионида бўлиб ўтадиган ўйинга кирриш бепул. Мухлисларни стадионга чорлаб қоламиз".