Элдор Мойлиев: «Ғалабани мухлисларга бағишлаймиз»

- Бугунги ўйинни мана шундай қийин бўлишини билардик. «Андижон» жамоасига янги мураббий сифатида Максим Шацких тайинланганди. Янги мураббий жамоани руҳиятини кўтаришини билардик. Дастлабки 10-15 дақиқада бизга босим ўтказишди. Лекин йигитларга раҳмат, улар чидаб беришди. Тайёргарлик кўрган ўйинимизни кўрсатиб беришди. Футболчиларга катта раҳмат. Бу уларнинг ютуғи. Ғалабани мухлисларга бағишлаймиз.

«Шўртан»ни ғалабага тайёрлашда кўпроқ нималарга эътибор қаратилди?

- Албата, тактик жиҳатдан у қадар ўзгаришларга қўл урмадик. Йил бошидан бери 4-3-3 схемаси бўйича тайёргарлик кўриб келдик ва шу тактикада ўйнадик. Йигитларни руҳиятини кўтаришга эътибор қилдик. Фикрлашини ўзгартиришга ҳаракат қилдик. Ўзига бўлган ишончни ҳам оширишга урғу қаратдик. Асосий эътибор берган нарсамиз шу бўлди. Биласизлар, яқиндагина Кубок ўйинида ўйнадик. Эътиборни футболчиларни ижобий фикрлашига қаратдик.

Жамоа Суперлигада гол уришга қийналмоқда. 10 та турда 4 та гол урди. Бугун ҳам бир қатор имкониятлар бўлди, аммо фойдаланишга келганда жамоа оқсаяпти...

- Биласизлар, бу сафар ҳам ёш ҳужумчиларни туширяпмиз, улардан бири 2006 йилда туғилган. Футболчиларимизни кўпчилиги ёш. Турдан-турга ўзларига ишончи ортади ва ушбу камчиликни ҳам тўғрилаймиз. Машғулотларда яна ўз устиларида ишлашади. Ҳозирда иқтидорли ёшларимиз бор. Уларни ҳам асосий жамоага жалб қилишни бошладик. Шу ёшлардан умидим катта.

Яқинлашаётган трансфер ойнасида таркибни кучайтириш учун қандай режалар қилинади? Ёки ёшларга эътибор қаратишда давом этасизларми?

- Албатта, етакчи футболчилар бизга ҳам керак бўлади. Суперлигада ҳар хил босимда ўйинлар бўлади. Ҳужум чизиғига, ҳимояга имкон қадар яхши ўйинчиларни олишга ҳаракат қиламиз. Шу билан бирга асосий эътибор ёшларга қаратилган. Раҳбарият ҳам шуни талаб қилган ҳолда ғалабалар қозониб мухлисларни хурсанд қилишни хоҳлашади.