Егор Кримец: “Меҳнатимиз эвазига чемпион бўлдик”

У жамоа академиясида таҳсил олган. Клуб анъаналари ва ғолиблик руҳияти билан яхши таниш. Егор ёш бўлишига қарамай, иккинчи марта Ўзбекистон чемпиони деган  шарафли унвонни қўлга киритди. Жамоанинг чемпионликкача босиб ўтган йўли ва бошқа ҳолатлар ҳақида у саволларимизга жавоб берди.

- “Пахтакор” учун мавсум муваффақиятли ўтди деб айтиш мумкин. Асосан ўз тарбияланувчиларига эътибор қаратиб, ўнинчи бор олтин медалларга эга чиқди. Мавсумга қандай баҳо берган бўлардинг?
- Чемпионат арафасида олдимизга мавсумни соврин билан якунлаш ҳақида вазифа қўйгандик. “Пахтакор” ёш таркибга эга бўлиши мумкин, лекин мухлислар жамоадан ҳамиша юқори натижаларни кутишади. Ўтган мавсумда жамоа олий лигада совринли поғоналардан четда қолганди. Шу сабабли дастлабки турларданоқ майдонда бор кучимизни ишга солган ҳолда мухлисларимизни ғалабалар билан хурсанд этишга уриндик. Бу ҳаракатларимиз 24 учрашувдан кейин бизга чемпионлик унвонини келтирди. Бундан барчамиз хурсандмиз. Чунки олий лигада тенгсиз бўлиш учун жамоа катта ҳажмдаги ишни бажарди. Ўтган йилдан бошланган йиғиндан то ҳозирги кунгача мақсадимиз чиройли футбол кўрсатган ҳолда ғалабага эришиш эди. Фақат чемпион бўлганимиздан сўнг бир оз тинчландик. Лекин олдимизда янада юқори мақсадлар бор ва улар сари интилишда давом этамиз. Мавсум давомида бир жамоа бўлиб бирлаша олганимиз, бир мақсад йўлида тер тўкканимиз ва бир оилага айлана олганимиз бизга қўл келди.

- Энг қийин ўйин сифатида қайси баҳсни таъкидлаган бўлардинг?
- Наманганда “Навбаҳор” билан ўтган учрашувни. Ўша куни мезбонлар сўнгги дақиқаларга қадар майдонда кескин курашга киришишди. Биз эса вазиятлардан унумли фойдалана олмадик. Яхшиямки, охирги дақиқаларда мезбонлар хатога йўл қўйишди ва бундан унумли фойдаландик. Ўша учрашувда руҳий тарафдан катта фойда олдик.

- Бу йил жамоада қандай ўзгаришларга дуч келдинг?
- Учрашувларга тайёргарлик жараёнида ва машғулотларда янада яхшироқ ишлай бошладик. Ҳар бир рақибнинг бир неча ўйинларини кўриб чиқиб, унинг кучли ва кучсиз тарафларини ўргандик. Машғулотларда шунга яраша тайёргарлик кўрдик. Бу қандай фойда келтирганини кўриб турибмиз. Чемпионликка мағлубиятсиз эришганимиз ҳам буни исботлайди. Таркибда академия тарбияланувчилари ва анчадан буён жамоада ўйнаб келаётган футболчилар йиғилгани сабабли ўзаро тушуниш ва жамоадаги ҳолат борасида умуман муаммо йўқ. Бу жиҳатлар ҳам бизга катта фойда келтирди.

- Кейинги мавсумда “Пахтакор” ОЧЛни гуруҳ босқичидан бошлаши кутилмоқда. Жамоа айни пайтдаги ҳолати билан Осиёнинг клублар учун биринчи рақамли турнирида ижобий натижа қайд эта олади деб ўйлайсанми?
- Жамоада барча шуни ният қилмоқда. Келаси йил чемпионат ва кубок ўйинларидан ташқари Чемпионлар лигасида ҳам яхши иштирок этишни хоҳлаймиз. Бизда бу мусобақада ўйнаш тажрибаси бор. 2 йил олдинги тажриба бу сафар бизга ёрдам беради деб ўйлайман. 2013 йил айнан тажриба етишмаслиги ва ҳали ўйин савиямиз ҳозиргидек бўлмагани сабабли гуруҳда қолиб кетгандик. Кейинги йил ишқибозларни халқаро майдондаги ишончли ўйин билан ҳам хурсанд этишни истаймиз.