Достон Ҳамдамов: "Қозоғистон билан яхши ўйин бўлади"

Бугун "Жар" стадионида миллий жамоамиз ва "Пахтакор" футбол клуби вингери Достонбек Ҳамдамовнинг фикрларига қулоқ тутдик.

— Достон, Суперлига якунланди. Кайфиятлар қанақа?

— Аввало, "Пахтакор"нинг барча мухлисларини чемпионлик билан табриклайман. Бу ғалабани учун анча меҳнат қилдик ва кутдик. Мавсум якунланиши билан ҳаммасини унутиб, эртаси кундан Қозоғистонга қарши ўтадиган ўйин учун тайёргарликни бошладик. 

— Бу йиғинда ўзингизни қандай ҳис қиляпсиз?

— Қийин деб бўлмайди. Мураббийлар билан тезроқ тикланиш учун шуғулланяпмиз. Ўйинда бор кучимизни берамиз.

— Рақиб ҳақида нима дея оласиз?

— Бу ҳақда ҳозир нимадир деёлмайман. Фақат ўйин яхши бўлишини биламан. 

— Ҳаво совуқ бўлса, томошабинлар ташрифи қанчалик бўлади?

— Иложи борича барча мухлислардан келишларини сўраб қоламиз. Худо хоҳласа, уларга чиройли ғалаба тақдим қиламиз.