"Динамо"дан навбатдаги йирик ғалаба

Учрашувни ҳужумкор бошлаган мезбонлар ўйиннинг 4-дақиқасидаёқ ҳисобни очишди. Чап қанотдан етказиб берилган тўпни ёш ҳужумчи Амиржон Сафаров бош билан ажойиб тарзда рақиб дарвозасига жойлаб қўйди, 1:0.

Голдан руҳланган мезбонлар мухлисларнинг қўллаб-қувватлаши остида ҳужумкорликни тўхтатишмади. Натижада 29-дақиқада яримҳимоячилар Амиржон Сафаровни яна яккама-якка вазиятига олиб чиқишди. Ўз ўрнида ёш ҳужумчи ҳам совуққонлик билан рақиб дарвозасига ўйиндаги иккинчи голни уриб, «дубли»ни нишонлади, 2:0.

Иккинчи бўлим ҳам Самарқанд жамоасининг устунлиги билан бошланди. 47-дақиқада яна ўша тиниб-тинчимас 21 ёшли ҳужумчи Амиржон Сафаров рақиб дарвозасининг узоқ бурчагини аниқ нишонга олиб, «хет-триги» эвазига 17 та гол билан Биринчи Лиганинг энг яхши тўпурари номини қўлга киритди, 3:0.

Учрашувнинг 58-дақиқасига келиб «Динамо» стадиони яна бир марта «ларза»га келди. Омаджон Тайлоқовнинг чамаси 25 метрлардан йўллаган зарбаси дарвоза тўсинига тегиб, чизиқни кесиб ўтиб, ўйин безагига айланди, 4:0.

Захирадан майдонга тушган тажрибали ҳужумчи Алишер Холиқов ҳам ўйинни кучайтиришга эришди. 70-дақиқага келиб айнан унинг жарима майдонидаги ажойиб ҳаракатлари ва зарбаси ҳисобнинг йирик 5:0 га етишини таъминлади.

Ушбу натижа янада йирик кўринишга келиши мумкин эди, аммо 90+1-дақиқада Бунёд Исроиловнинг бош билан берган зарбаси дарвоза устунига тегиб қайтди. Қарши ҳужумда эса муборакларнинг тажрибали футболчиси Баҳодир Муртазоев жамоасининг ягона жавоб голини киритди, 5:1.

Ушбу ғалабадан кейин «Динамо» пешқадамликни давом эттириб, мақсади йўлида яна бир муҳим қадамни ташлади.

Биринчи Лига. 27-тур.

22 сентябрь (пайшанба)

«Динамо» (Самарқанд) – «Машъал-2» (Муборак) – 5:1

Самарқанд, 1568 томошабин.

Ҳакамлар: Э. Турсунов (Бухоро) – 8,3, М. Турдиев (Жиззах) – 8,7, Ш. Юлдашев (Жиззах) – 8,1, Ш. Қамаров - 9

Голлар: А. Сафаров (4, 29, 47), О. Тойлоқов (58), А. Холиқов (70) – Б. Муртазоев (90 + 1).

«Динамо»: Михаил Наумов (Шуҳрат Муродов, 79), Бунёд Исроилов, Алексей Николаев, Акмал Бозоров, Миркомил Локаев, Искандар Холмирзаев (Комил Шарофутдинов, 64), Омаджон Тайлоқов, Фирдавс Абдусалимов (Ислом Шарипов, 60), Жонибек Кўчимов, Виктор Клишин (Алишер Холиқов, 50), Амиржон Сафаров (Асомиддин Маматов, 74)

«Машъал-2»: Ҳусан Олимжонов, Муҳаммад Тошпўлатов, Дониёр Умаров, Обид Маматов, Санжарбек Аҳмедов, Шокир Йўлдошев, Ёдгор Назаров, Баҳодир Муртазоев, Мақсуджон Маҳмудов, Шаҳзодбек Убайдуллаев, Бунёд Шодиев.

Огоҳлантиришлар: И. Холмирзаев (62) – М. Маҳмудов (23).

Назоратчи: С. Зайлобидинов (Фарғона).