Даврон Файзиев: "Металлург" ҳақиқатдан ҳам кучли жамоа эканини намойиш этди"

-  Учрашув кескин курашларга бой бўлди. “Металлург” ҳақиқатдан ҳам кучли жамоа эканини намойиш этди. Уларг бежизга кучли жамоалар қаторидан ўрин олишмаган. Бугунги ўйин шундай тарзда кечдики, қайсидир жамоа гол урса ўша жамоа ғалаба қозонарди. Учрашув битта гол билан якун топиш эҳтимоли катта эди.

Жамоадан кетган футболчилар ҳақида нима дейишим мумкин? Улар ўз ҳоҳишлари билан бошқа жамоаларга ўтишди. Давралар оралиғидаги йиғинимиз кўнгилдагидек ўтди деб айта оламан. Таркибимизни эса бир қатор футболчилар билан тўлдиришга ҳаракат қилдик. Бугун жамоага таклиф этилган янги футболчилар майдонда ёмон ҳаракат қилишмади.

Турнир жадвалидаги бизнинг натижаларимизга эътибор берсак, урилган голларимиз сони кам. Ҳужумчи муаммоси бор. Шу боис жамоага Ихтиёр Тошпўлатовни таклиф этдик. Бугунги ўйинда у майдонда ёмон ҳаракат қилмади, деб ўйлайман. Қисқароқ қилиб айтганда, бугун майдонда ҳаракат қилган янги футболчиларимизда бироз ҳаяжон борлиги сезилди. Балки уларнинг жиззахлик мухлислар олдидаги дастлабки ўйинлари бўлгани бунга сабабдир, - дейди Файзиев.

"Сўғдиёна" матбуот хизмати