"Бухоро" охирги иккита ўйинда 10та гол ўтказди

Жамоа 23-турдан бошлаб кетма-кет тўртта ўйинда мағлубиятга учраганди, орада битта ғалабага эришиб охирги уч ўйинда яна имкониятни бой берди. Ва энг даҳшатлиси, "Бухоро" жамоаси охирги икки учрашувда ўз дарвозасидан 10та гол ўтказиб юборди. Улуғбек Бақоев шогирдлари уйда "Пахтакор"га 2:6, сафарда эса "Локомотив"га 0:4 ҳисобида имкониятни бой беришди.

Албатта, кучли олтиликка кириб олган жамоанинг қаторасига мағлубиятдан боши чиқмаётгани ҳамда иккита учрашувда 10 гол ўтказиши жуда аянчли ҳолат. Мухлисларда эса савол юзага келяпти: гар шундай экан, "Бухоро"га кучли олтиликка кириб нима бор эди? Статистикага эътибор берадиган бўлсак, "Бухоро" клуби ўз тарихида биринчи бор кетма-кет икки учрашувда 10та гол ўтказди. Бунгача қаторасига икки ўйинда энг кўп ўтказган голи 7та бўлиб, бу воқеа 2011 ва 2004 йили содир бўлган.

2011 йил
13-тур. "Бунёдкор" - "Бухоро" 3:0
14-тур. "Бухоро" - "Бунёдкор" 0:4

2004 йилни "Бухоро" жуда омадсиз бошлаган. Жамоа дастлабки уч турда бирорта тўп кирита олмасдан ўз дарвозасидан 10та гол ўтказган. Бу йил эса иккита беллашувда шунча тўп ўтказиб юборди.

2004 йил
1-тур. "Бухоро" - "Нефтчи" 0:4
2-тур. "Металлург" - "Бухоро" 3:0
3-тур. "Бухоро" - "Пахтакор" 0:3