Бугун "Реал" "Ювентус"га қарши ўйнайди (Превью)

"Ювентус" - "Реал"
Сешанба, 23:45, Турин, "Альянц Стэдиум".
Учрашув бош ҳаками - Жунейт Чақир (Туркия).

Ўтган сафарги Европа чемпионлар лигаси финали ўтиб кетганига 10 ой ўтди. Ўшанда "Реал" "Ювентус"дан кучли эканлигини исботлаганди, мана шафқатсиз қуръа яна ушбу икки жамоани тўқнаштирди. Клубларнинг айни дамдаги кучини солиштирадиган бўлсак, икки томонга ҳам имкониятлар тенг деб айтишимиз мумкин.

Ўтган босқичда икки жамоага ҳам жиддий рақиблар билан баҳс олиб боришди. "Ювентус" АПЛнинг кучли жамоаларидан бири "Тоттенхэм" қаршилигини енгди. "Қироллик клуби" эса икки учрашувда ҳам ПСЖни таслим этди.

Иштиёқ ҳақида нималар дейишимиз мумкин... Бу ерда шак-шубҳасиз икки жамоанинг ҳам имкониятлари тенг, шу боисдан клублар максимал кучи билан ғалаба ва ярим финал учун ҳаракат қилади. "Ювентус" Италияда чемпионлик масаласини деярли ҳал қилган, кейинги мавсумда ЕЧЛда қатнашиши аниқ. "Реал" эса ЛаЛигада ўз ўрнини мустаҳкамлай олмаган, шу боисдан ЕЧЛда яна бир бор ғалаба қозонишни истайди.

Дам олиш кунларида жамоалар миллий чемпионатда ўйинлар ўтказишди. Мадридликлар деярли иккинчи таркиб билан "Лас-Пальмас"ни мағлуб этган бўлса, "Ювентус" жуда оғир учрашувда "Милан"ни таслим этди.

Зидан жамоасида айни дамда йўқотишлар йўқ, унинг қўл остида жангавор таркиб бор. Фақатгина Начода кичик жароҳат бор. Бироқ у жамоаси билан Туринга қўл олган. Аллегрида эса икки муаммо кўзга ташланмоқда. Бенатья ва Пьянич дисквалификация сабабли майдонга тушишмайди.

Энди Аллегри 4-2-3-1 тактик схемасига мурожаат этиши, Игуаиннинг ортида Дибала, чап қанотда Коста, ўнгда эса Куадрадо, шунингдек, ҳимояга Матюиди ва Хедира ёрдам бериши мумкин. Ўнг қанот ярим ҳимоясига яна бир номзод - Бернардески ёки бўлмасам ҳужумга Манжукич ҳам яхши вариант.

ТАХМИНИЙ ТАРКИБЛАР

"Ювентус": Буффон - Де Шильо, Бардзальи, Кьеллини, Асамоа - Хедира, Матюиди - Куадрадо, Дибала, Коста - Игуаин.

"Реал: Навас - Карвахаль, Рамос, Варан, Марсело - Модрич, Каземиро, Кроос - Иско - Бензема, Роналду.

Жароҳатланган: Начо ("Реал").

Сўроқ остида: Сандро, Манжукич, Бернардески (барчаси "Ювентус"дан).

ҚИЗИҚАРЛИ ФАКТЛАР

- "Ювентус" ЕЧЛ доирасидаги сўнгги тўрт плей офф учрашувларидан эсон-омон ўтиб олган.

- Томонлар ўзаро 20 учрашув ўтказишган. Унда икки жамоа ҳам 9тадан ғалабага эришишган. Дуранглар сони 2та. "Реал" 23, "Ювентус" 24 гол киритган.

- "Реал" таркибига ўтганидан кейин Роналду 5 ўйинда "Ювентус" дарвозасига 7 гол киритган.

- "Реал" ЕЧЛнинг 1/4 финалида 35-учрашувини ўтказади. Бу эса рекорддир.

- "Ювентус" "Реал"га қарши ўтган сўнгги 7 уй учрашувида мағлуб бўлмаган (6 ғалаба, 1 дуранг).

- "Ювентус" 18-бора ЕЧЛ чорак финалида ўйнайди. Улар кетма кет еттинчи марта турнирнинг ушбу босқичига етиб келди. Бу эса клуб рекордидир.

- "Ювентус"нинг Испания клублари билан уй учрашувлари статистикаси: 15 ғалаба, 9 дуранг, 2 мағлубият.

- "Ювентус"нинг еврокубоклардаги уч учрашувларда мағлубиятсиз серияси 27 учрашувни ташкил этади: 16 ғалаба, 11 дуранг.

- "Реал"нинг ЕЧЛ доирасида Италия жамоаларига қарши ўтган сафар учрашувлари: 6 ғалаба, 8 дуранг, 18 мағлубият.