Бугун футбол. "Қўқон-1912" - "Металлург"

"Қўқон-1912" ўз майдонида "Металлург"ни қабул қилади. Турнир жадвалида ушбу жамоалар ёнма-ён ўринларни эгаллаб туришибди. "Металлург" 24 очко билан 8-ўринда бораётган бўлса, "Қўқон-1912" 21 очко тўплаган ҳолда 9-ўринда боряпти. "Металлург"да тўплар нисбати 22-22, яъни ноль. "Қўқон-1912" эса гол уришдан кўра кўпроқ ўтказиб юборган, 24-35 (-11). 

Бугунги беллашув қўқонликлар учун уйдаги 10-баҳс бўлади. Жамоа шу пайтгача учтадан ғалаба, дуранг ва мағлубият қайд этган. "Қўқон-1912" уй учрашувларида 12 очко жамғарган. 

"Металлург" учун бугунги баҳс сафардаги 11-чиси бўлади. Аввалги 10та ўйиннинг фақат биттасида ғалаба қозонган "Металлург" 5 марта дуранг ўйнаб, тўртта беллашувда имклониятни бой берган. Бекободликлар сафарда фақат "Насаф"ни мағлуб этишнинг уддасидан чиқишган. 

Иккинчи даврани "Қўқон-1912" жуда яхши ўтказяпти. Хусусан жамоа қаторасига 5 ўйиндан бери ютқазгани йўқ: тўрт ғалаба ва бир дуранг. Бунинг устига қўқонликлар кетма-кет тўртта учрашувни уйда ўтказишди, бугунгиси бешинчиси бўлади. 

"Металлург" эса иккинчи даврани ўз имконияти даражасида ўтказяпти. Бу жамоа охирги учта ўйинда биттадан ғалаба, мағлубият ва дуранг қайд этди. 

Бекободда кечган биринчи давра учрашувида "Металлург" 3:1 ҳисобида зафар қучганди. Қўқондаги охирги баҳсда эса ўтган йил майдон эгалари 2:1 ҳисобидаги ғалабани тантана қилишган. 

Қўқонда кечган охирги 5 ўйин 

2018. "Қўқон-1912" - "Металлург" 2:1 

2017. "Қўқон-1912" - "Металлург" 3:0

2016. "Қўқон-1912" - "Металлург" 2:1 

2015. "Қўқон-1912" - "Металлург" 2:1 

2003. "Қўқон-1912" - "Металлург" 4:0  

Кўриб турганингиздек, Қўқонда бўлиб ўтган охирги беш учрашувнинг ҳаммасида мезбонлар зафар қучган. "Металлург" ҳеч бир баҳсда биттадан кўп тўп кирита олмаган. Икки бор йирик ҳисоб қайд этилган ва уч марта 2:1 ҳисоби билан якун топган.