Бугун футбол. "Қўқон-1912" - "Локомотив"

Бугун "Қўқон-1912" ўз майдонида амалдаги чемпион "Локомотив"ни қабул қилади. Ўйин 17:30да бошланади.

Олий лига. 11-тур. 17 май
"Қўқон-1912" - "Локомотив"
Ҳакамлар: В. Цейтлин (Тошкент), А. Снетков (Тошкент вил.), А. Калинин (Қарши), А. Шукуруллаев (Тошкент).
Назоратчи: А. Арутюнов (Тошкент).
ПФЛ вакили: Б. Маметов.

Ўйиндан нима кутяпмиз? Турнир жадвалида биринчи-иккинчи ўринда бораётган жамоаларнинг ўзаро қарама-қаршилиги. Бугун Қўқон шаҳрида қизиқарли баҳс кечиши кутилмоқда. Иккала жамоа ҳам ғалаба мақсадида майдонга тушса ажаб эмас. Имкониятлар борасида "Локомотив"нинг устунлигини айта оламиз, чунки тошкентликлар таркиб жиҳатдан кучли, бироқ ҳаммасини майдондаги кураш ҳал қилади.

Турнир жадвалидаги вазият: "Локомотив" 22 очко билан пешқадамликни ўз қўлида ушлаб турибди.  "Қўқон-1912" эса рақибидан 3 очко кам жамғарган ҳолда иккинчи ўринда бормоқда.

Факт: Бугун  "Қўқон-1912" ўз майдонида олтинчи учрашувини ўтказади. Аввалги беш ўйинда қўқонликлар учта ғалабага эришган ҳолда бир мартадан дуранг ва мағлуб бўлишган. Тўплар нисбати 8-4. "Қўқон-1912" ўз уйидаги баҳсларда 10 очкони қўлга киритган.

Факт: "Қўқон-1912" уйда "Қизилқум" (1:0), "Динамо" (2:1) ва "Металлург"дан (3:0) устун келган. "Пахтакор" билан дуранг (1:1) ўйнаган бўлса, "Насаф"га (1:2) имкониятни бой берган.

Биласизми? Иккала жамоа ҳам мавсум бошидан бери фақат бир мартадан мағлубиятга учради. "Қўқон-1912" ўз майдонида "Насаф"дан енгилган бўлса, "Локомотив" Ғузорда "Шўртан"га имкониятни бой берган.  

Факт: Бугунги ўйин "Локо" учун сафардаги бешинчи баҳс бўлади. Жамоа аввалги тўртта ўйиннинг иккитасида зафар қучган. "Машъал" ва "Пахтакор" клублари мағлуб этилган. "Навбаҳор" билан дуранг ўйналган бўлса, "темирйўлчилар" "Шўртан"га ютқазиб қўйишган. Сафардаги учрашувларда тўплар нисбати 5-5.

Биласизми? "Локомотив" олий лигада қаторасига бешта ўйиндан бери ютқазмай келмоқда: тўрт ғалаба ва бир дуранг. Тўплар нисбати 15-4.

Эсингиздами? 2015 йилги мавсумда "Қўқон-1912" ўзида "Локо" билан 2:2 ўйнаган ва учрашувдан сўнг "термирйўлчилар"нинг ўша пайтдаги бош мураббийи Вадим Абрамов истеъфога чиқарилганди. Ўтган йилги беллашувда эса "Локомотив" сафардан 3:1 ҳисобидаги ғалаба билан қайтган.