Бугун футбол. "Қизилқум" - "Сўғдиёна"

Кун тартибидан учта ўйин ўрин олган. "Қизилқум" ўз майдонида Жиззахнинг "Сўғдиёна" клубини қабул қилади. Ўтган турда "Қизилқум" АГМКни мағлуб этганди. "Сўғдиёна" эса сафарда "Насаф"га имкониятни бой берди.

"Сўғдиёна" иккинчи босқичда фақат иккита ўйинда ғалабага эришди ва иккала ғалаба ҳам уйдаги ўйинларда қўлга киритилди. Сафарда эса бу жамоа фақат ютқазиб келяпти. "Қизилқум" ҳақида гапирадиган бўлсак, навоийликлар иккинчи босқичнинг иккита ўйинида ютишди ва иккала ғалаба ҳам уйдаги ўйинларда рўй берди.

"Қизилқум" ўз уйида чакки эмас, жамоа исталган рақибига етарли қаршилик кўрсата олади. Шу томонлама ҳам бугунги беллашувда майдон эгаларининг устунлиги тахмин қилинмоқда. Қолаверса, "Сўғдиёна"нинг негадир сафарда омади чопмаяпти. Жиззахликлар сафар ўйинларида охирги марта 13-турда зафар қучишганди. Ўшанда Сергей Лушан шогирдлари Фарғонада "Нефтчи"ни мағлуб этиб қайтишган.