Бугун футбол. "Навбаҳор" - "Локомотив"

"Локомотив" сафарда "Навбаҳор" меҳмони бўлади. Турнир жадвалида "Локомотив" 19 очко билан 7-ўринни эгаллаб турибди. Тўплар нисбати 19-17. "Навбаҳор" эса 17 очко тўплаган ҳолда 8-ўринда боряпти. Кўриниб турибдики, бугун мусобақа жадвалида кетма-кет ўринларда бораётган икки жамоа тўқнашувига гувоҳ бўламиз. 

Бугунги беллашув "Локо" учун сафардаги 8-баҳс бўлади. "Темирйўлчилар" шу пайтгача сафар ўйинларида уч бор ғалаба қозонишган: "Сурхон", "Машъал" ва "Андижон" устидан. Шунингдек, иккитадан дуранг ва мағлубият қайд этилган. Сафар баҳсларида тўплар нисбати 11-8. 

"Навбаҳор" учун бугунги учрашув ўз майдонидаги 8-ўйин бўлади. "Лочинлар" уйдаги беллашувларда "Сурхон" ва "Машъал"ни мағлуб этиб, "Насаф" ва "Турон" билан 0:0 ўйнашган ҳамда "Сўғдиёна", "Пахтакор" ва "Андижон"га қарши баҳсларда имконият бой берилган. Уйдаги ўйинларда тўплар нисбати 5-5. 

Биласизми? Ҳар икки жамоа ҳам Суперлигадаги охирги уч ўйинида биттадан ғалаба қозонди. "Локомотив" ўз майдонида "Насаф"ни мағлуб этган бўлса, "Навбаҳор" сафарда "Қўқон-1912"дан устун келишга муваффақ бўлди. 

Биринчи даврадаги беллашувда "Локо" ўз майдонида 1:2 ҳисобида ютқазиб қўйганди. Бугун "темирйўлчилар" ўша мағлубият аламини олишга уриниб кўришади. Мазкур баҳс "Дунё бўйлаб" канали орқали соат 20:00дан жонли эфирга узатилади.