Бугун футбол. "Бунёдкор" - "Қўқон-1912"

Турнир жадвалида "Бунёдкор" 3-ўринда бормоқда ва бу жамоанинг кучли олтиликка кириши ҳал бўлган. "Қўқон-1912" эса 24 очко билан 8-ўринда боряпти. Қўқонликларни олтинчи ўриндаги "Металлург"дан атиги уч очко ажратиб турибди, шундай экан кураш охиригача кечади.

Бугун "Бунёдкор" ўз майдонида 10-баҳсини ўтказади. Бунгача ўтказилган тўққизта баҳсдан 7тасида жамоа зафар қучган. Бир бор дуранг ўйнаб, бир марта мағлуб бўлган. "Бунёдкор" ўз майдонида фақат "Локомотив"га имкониятни бой берган. АГМК билан эса дуранг қайд этган. Уйдаги ўйинларда тўплар нисбати 17-8.

Биласизми? "Бунёдкор" ўз майдонидаги охирги тўртта учрашувда фақат ғалаба қозонди. "Қалдирғочлар" уйда "Навбаҳор" (2:1), "Қизилқум" (2:0), "Нефтчи" (2:1) ва "Насаф" (2:1)дан устун келишди.

"Қўқон-1912" ҳақида гапирадиган бўлсак, бу жамоа сафарда шу пайтгача 9та учрашув ўтказиб, фақат биттасида ғалабага эришган. Нўъмон Ҳасанов шогирдлари 2-турда "Қизилқум"ни мағлуб этиб қайтишган. Шундан кейин бу жамоа тўрт марта дуранг ўйнади ва шунча беллашувда мағлуб бўлди. "Қўқон-1912"нинг сафардаги тўплар нисбати 5-9.

Факт: "Қўқон-1912" сафарда қаторасига олтита ўйиндан бери ғалаба қозона олмаяпти. Шунингдек, охирги иккита ўйини мағлубият билан тугаган. "Қўқон-1912" сўнгги бор сафарда "Пахтакор"дан очко олган. Жамоа 1:1 ҳисобини қайд этган.