Болалар футболи: “Андижон” “Наврўз Кубоги” ғолиби

15 та жамоа тўрт гуруҳда кураш олиб боргани, чорак ва ярим финал баҳсларидан кейин 3-ўрин учун “Навоий” ва “Андижон”, 1-ўрин учун эса “Ифтихор” ва “Янгиер” ёш футболчилари майдонга тушишларини ёзгандик. Бироқ мусобақа тақвимида ўзгариш юз берди. Ярим финалда ғалаба қозонган “Ифтихор” жамоаси таркибида рўйхатдан ўтмаган футболчи майдонга тушгани ва бу билан жамоа Регламент тартиб-интизом кодексининг 5.11 моддасини бузганлиги учун турнир ташкилотчилари ушбу жамоанинг ярим финалдаги ўйин натижасини бекор қилди. Унга кўра, ярим финалда мағлуб бўлган “Андижон” жамоасига техник ғалаба ва финал йўлланмаси берилди, “Ифтихор” эса чорак финал натижаси билан кифояланадиган бўлди.

Шу тариқа мусобақанинг ҳал қилувчи финалида Андижон ва Янгиер ихтисослашган футбол мактабларининг ёш футболчилари ўзаро куч синашадиган бўлди. Қизиқарли кечган ўйинда андижонликлар йирик ҳисобда зафар қучишди ва “Наврўз Кубоги” ғолиби бўлишди.

Кичик олтин, кумуш ва бронза медаллари билан тақдирланган “Андижон”, “Янгиер” ва “Навоий” жамоаларига дипломлар ва Кубоклар топширилди.