Биринчи лига. Мавсумнинг кашфиёт жамоаси: “Обод”!

Буни қанчалик амалладик, муносиб баҳони ўқувчилар беришади. Лекин ҳар бир клуб расмийларидан бунинг учун алоҳида миннатдорчилик эшитиб келдик.

Ортда қолган мавсум-2014да биринчи лига учрашувларини сайтимизда ёритиб борилишида асосий ишни бажарган  4 нафар ходимимиз турли номинациялар бўйича энг яхшиларни аниқлади.

Хусусан бу йилги мавсумда кашфиётга айланган жамоа “Обод” бўлди. Тошкент жамоасининг дебют мавсумидаёқ кичик бронза медалларини қўлга киритгани ҳам қайсидир маънода фикрларимизни тўлиқ исботласа ажаб эмас. Умуман олганда Хайрулла Абдиев ва Фарҳод Сафаров бошқарувидаги жамоа мавсум-2014ни юқори даражада ўтказди дейиш мумкин. Кўрамиз келаси йил ҳам “Обод” ўзини қанчалик кўрсата оларкин.

Кейинги ўринни банд этган “Машъал-2” ҳам ёмон таассурот қолдирмади. Дилшод Андаев бошчилигидаги жамоа бу йил яна биринчи лигадаги иштирокини бошлади. Таркиби асосан академия битирувчиларидан ташкил топган бўлишига қарамай, муборакликлар жиддий курашди.

Яна аввалги мавқеини тиклаб бораётган Андижоннинг “УзДонгЖу” жамоаси ҳам биринчи лигага қайтишини ёмон бошламади. Нозим Муллаохунов бошқарувидаги клуб якунда 5-ўринни эгаллади.

Нукуснинг “Орол” жамоаси ўтган йилга нисбатан ушбу мавсум барқарор ўйин кўрсатди. Неъматулла Қутибоевга етарли шароитларни яратиб берилса, курашчан жамоа туза олишини бу йил кўрдик.
Косоннинг “Аланга”си ҳам жорий чемпионатда жиддий курашди. Анвар Ўринов қисқа фурсат ичида яхши жамоа шакллантира олди.  

Кашфиёт жамоа:
“Обод” (Тошкент) - 17
“Машъал-2” (Муборак) - 16
“УзДонгЖу” (Андижон) - 12
“Орол” (Нукус) - 8
“Аланга” (Косон) - 6