Бердиев ва Геворкян – сентябрь ойи лауреатлари!

Сўровномада журналистлар Олий Лига ва Биринчи Лига клубларида фаолият олиб бораётган жами 12 нафар мураббий ва 17 нафар футболчини ғолибликка даъвогар сифатида кўрсатишди.

Мураббийлар ўртасидаги курашда «Насаф» бош мураббийи Рўзиқул Бердиев 78 очко тўплади ва 2-ўринни эгаллаган «Машъал» бош мураббийи Александр Хомяковни 23 баллга ортда қолдиришга муваффақ бўлди. Эътиборли томони, сентябрь ойи сўровномасида журналистлар Рўзиқул Бердиевни 10 марта биринчи ўринга лойиқ мураббий сифатида кўрсатишди.

Футболчилар орасида эса сентябрь ойи якунларига кўра «Насаф» ярим ҳимоячиси Артур Геворкянга тенг келадиган футболчи топилмади. Ярим ҳимоячи сентябрь ойи сўровида ўзининг энг яқин таъқибчиси, Муборакнинг «Машъал» жамоаси ҳужумчиси Зоҳир Қўзибоевни 10 баллга ортда қолдирди ва 64 балл билан 2014 йил ҳисобидан биринчи марта ойнинг энг яхши футболчиси деб топилди.

Маълумот ўрнида, март-ноябрь ойларида ўтказиладиган Ойнинг энг яхши футболчиси ва мураббийи танловиларининг натижалари умумлаштириб чиқилади ва натижалардан келиб чиқиб, ЎзПФЛнинг 2014 йилдаги энг яхши футболчиси ва мураббийи номи аниқланади.

«Ойнинг энг яхши ўйинчиси» сўровномаси сентябрь ойи кучли бешлиги:
1. Артур Геворкян («Насаф») – 64 балл;
2. Зоҳир Қўзибоев («Машъал») – 54 балл;
3. Виктор Клишин («Шўртан») – 30 балл;
4. Шуҳрат Муҳаммадиев («Насаф») – 27 балл;
5. Воҳид Шодиев («Бунёдкор») – 15 балл.

«Ойнинг энг яхши мураббийи» сўровномаси сентябрь ойи кучли бешлиги:
1. Рўзиқул Бердиев («Насаф») – 78 балл;
2. Александр Хомяков («Машъал») – 55 балл;
3. Вадим Абрамов («Локомотив») – 51 балл;
4. Сергей Лушан («Бунёдкор») – 34 балл;
5. Фурқат Эсонбоев («Оқтепа») – 10 балл.