Бектемир Абдуманнонов: "Мухлисларни узоқ вақтдан бери хурсанд қилмаётган эдик. Олимпия терма жамоасига чақиришса, ишончни оқлайман"
27 июн 15:00
Новости

Бектемир Абдуманнонов: "Мухлисларни узоқ вақтдан бери хурсанд қилмаётган эдик. Олимпия терма жамоасига чақиришса, ишончни оқлайман"

Суперлига 13-туридан ўрин олган "Андижон" - "Навбаҳор" (3:0) учрашувидан сўнг "Андижон" футболчиси Бектемир Абдуманнонов сайтимизга интервью берди.

- Бугунги учрашув ҳақидаги фикрларингиз...

- Чиройли ва қизиқарли баҳс бўлди. Бугун омад бизга кулиб боқди. Мухлисларни узоқ вақтдан бери хурсанд қилмаётган эдик. Рақиб ҳам бугун анча яхши ўйин намойиш этди, аммо биз майдонда кучлироқ эдик. Бугунги ғалабани мухлисларга бағишлаймиз. Олға, "Андижон"! Олға, "Ультрас Бургут"!

- "Андижон" мавсумни ажойиб тарзда бошлаганди, лекин кейинчалик кетма-кет 7 та учрашувда ғалаба қозона олмади. Ушбу омадсиз серияга нима сабаб бўлди?

- Ҳа. Мавсумни жуда яхши бошладик, аммо кейинчалик муаммоларга дуч келдик. Ҳакамлар билан боғлиқ муаммолар ҳам бўлди. Ушбу вазиятдан чиқиб кетиш учун ҳаракат қилдик.

- "Гол+пас" тизими бўйича Суперлиганинг энг яхши футболчиларидан бири бўлиб турибсиз. Ушбу натижа сизга қўшимча жавобгарлик юкламоқдами?

- Бундай статистика қайд этаётганимга Яратган сабабчи. Мен фақатгина меҳнат қилмоқдаман. Энг муҳими, ҳар бир учрашувда жамоага кўпроқ фойда келтиришни истайман. Гол ва ассистларни янада кўпайтиришга ҳаракат қиламан. Ҳозир яхши спорт формадаман. Олимпия терма жамоасига чақиришса ва менга имкон беришса, ўзимни кўрсата олишимга ишонаман.