Бахтиёр Ашурматов: "Дурангга мос ўйин бўлди"

- Ўйин жанговор руҳда ўтди. Афсуски, ҳимоядаги хатоларимиз бизга қимматга тушди. Бугун дурангга мос ўйинга гувоҳ бўлдик. Ҳар икки жамоа ҳам ғалаба учун ҳаракат қилишди. Омад "Қизилқум"га кўпроқ кулиб боқди. Шу сабабли мағлубиятга учрадик. "Қизилқум"га қарши баҳс биз учун катта ахамиятга эга эди. Сабаби, агарда навоийликларни мағлуб этганимизда мусобақа жадвалида юқорироқ ўринларга кўтарилиб олардик. Биринчи даврада ўз олдимизга қўйилган вазифани бажара олмадик дейиш мумкин. Яна олдинда иккита чемпионат ўйинлари бизни кутиб турибди. Вазиятни тўғирлаб, мухлислар олдида айбимизни ювишимиз керак. Бошқа иложимиз қолмади. Бахриддин Ваҳобов ушбу мавсумда яхши ўйин кўрсатмоқда. Учрашувдан олдин ҳам буни айтиб ўтгандим. У голга чанқоқ ва ҳар бир вазиятдан унумли фойдаланиш имкониятига эга ўйинчи. Бахриддиннинг керакли жойда бўлиш хислати эвазига "Қизилқум" бугун 3 очкони қўлга киритди. Дарвозабонимиз жарохати? У ҳозир бемалол юра олмаяпти. Меленчук йўқ жойдан жарохат олди. Унинг шикастланиши ҳам "Навбаҳор"га салбий таъсир ўтказди. Захирадан ўйинчи чиқариб, ўйинни кучайтириш имконидан маҳрум бўлдик. Шаҳбоз Эркиновни афсуски ўйинга тушира олмадик.