Бахтиёр Ашурматов: “Бундай нурсиз ўйин билан ютқазиш жуда аянчли”

"Афсуски барчанинг эътирозига сабаб бўладиган ўйин бўлди. Жуда ҳам муҳим бўлган 3 очкони қўлдан бой бердик. Бундай нурсиз ўйин кўрсатиб, кам вазиятлар яратиб мағлуб бўлиш жуда ҳам аянчли. "Шўртан" яхши ўйнади ва ҳақли равишда ғолиб бўлди. Бу ўйин ҳали жуда кўп иш олиб боришимиз кераклигини кўрсатиб берди. Мағлубият мухлисларнинг кескин эътирозига сабаб бўлди. Ушбу ўйин бизни янада кучлироқ қилиши керак. "Андижон" жамоаси билан яна мухлисларнинг ишончини қозонсам бугунги мағлубиятни унутамиз.

Анвар Бердиевни нега вақтли алмаштирдим? Гапни очиғи қайсидир футболчи туфайли мағлуб бўлмадик. Мағлубиятда мураббийлар штаби айбдор. Биринчи бўлимда вазиятлар яратишда оқсадик. Йовановичнинг ёнига тезкорроқ ҳужумчи керак эди. Мағлубиятдан сўнг ўзгариш нотўғри қилингандек туюлаверади. Шоғуломов ҳаракат қилди, аммо гол ура олмади.

Азамат Исроилов Универсиада мусобақаларида иштирок этди. Шу боис ўнг қанотда Иброҳим Раҳимовни ўйнатдик. Жавлон Гусейнов ва Темур Васильев эса яқиндагина жароҳатидан қутулди, - дейди Ашурматов.

“Андижон” матбуот хизмати.