Баҳром Ҳайдаров: "Иккинчи бўлимда тажриба ўз сўзини айтди"

Ўйин ҳақида

- Жамоамиз вакиллари ва мухлисларимизни ғалаба билан табриклайман. Рақибимиз ёш футболчилардан иборат бўлишига қарамасдан биринчи бўлимда жуда фаоллик билан ҳаракат қилишди. Келажаги порлоқ йигитлар эканликлари кўриниб турибди. Танаффусдан сўнг бизнинг жамоа вакиллари ўйинни кучайтиришди ва тажриба ўз сўзини айтди.

- Биринчи бўлимда 0:0, иккинчи бўлимда 7 та гол урилиши камдан-кам учрайдиган ҳодиса. Буни кутганмидингиз?

- Бунақа йирик ҳисоб бўлмаса ҳам бугун ғалаба қозонишимизга ишонган эдим. Кўп гол уришимизни кутгандим. Иккинчи бўлимда тажриба ўз сўзини айтди. 

Учрашувнинг биринчи бўлимда майдонга ўйин амалиёти кам футболчиларни туширгандик. Иккинчи бўлимда ҳозирги кундаги асосий таркибимиз вакилларини ўйинга ташладик.

- Йирик ҳисобда қозонилган ғалаба Суперлига ўйинлари олдидан жамоага қандай иштиёқ беради?

- Бунинг устида ишлаймиз. Боиси, вазият ижобий томонга ҳам, салбий тарафга ҳам кетиб қолиши мумкин. Асосий мақсадимиз гуруҳдан чиқиш. Навбатда "Хоразм" билан ўйин ҳам осон бўлмайди.

- Легионер футболчи Амед Кобена билан шартнома бекор қилинишига муносабатингиз?

- Биз ушбу футболчи билан бир ой муддатлик синов шартномаси имзолагандик. Бу вақтда ўзини кўрсата олмади. Аввалдан жароҳати бор экан, бу машғулотлар жараёнида ҳам панд берди. Шу боис Кобена билан шартномани бекор қилишга мажбур бўлдик.