Баҳодир Аҳмедов: “Энг муҳими Рустам Умаров ишончли ўйин намойиш этмоқда”

Биз терма жамоамиз ёрдамчи мураббийи, собиқ футзалчи Баҳодир Аҳмедовдан ўйиндан сўнг интервью олдик.

-  Аввалам бор бугунги ғалаба ва ЖЧ йўлланмаси билан табриклайман. Ироқ терма жамоасига қарши ўйин ҳақида фикрларингиз.
-  Бугунги ғалаба ва Жаҳон чемпионати йўлланмаси билан барчангизни терма жамоамизни қўллаб – қувватлаб турган мухлисларимизни табриклайман. Жуда ҳам оғир ўйин бўлди, бунинг учун футзалчиларимизга катта раҳмат. Бугун йигитларимиз сўнгги дақиқагача бор кучлари билан рақибга қаршилик кўрсатиб йирик ҳисобда ғалаба қозонишди.

-  Бугунги рақиб терма жамоаси ҳақида қандай фикр билдирасиз?
-  Ироқ терма жамоаси бизга қарши жуда кучли ўйин намойиш этишди. Мен уларга кейинги ўйинларда омад тилаб қоламан. Олдинда турган учрашувларда сўнгги бешинчи йўлланмани қўлга киритишсин.

-  Ярим финалда бизга Таиланд терма жамоаси рақиблик қилади. Ушбу ўйин олдидан қандай фикр билдирасиз?
-  Ушбу ўйинга бугундан бошлаб тайёргарлик кўришни бошлаймиз. Эртага машғулотимиз бор, Таиланд терма жамоасини кучли ва заиф жойларини кўриб уларга яраша тайёргарлик кўрамиз.

-  Турнир бошланганидан бери Рустам Умаров ажойиб ўйин кўрсатиб термамизга муҳим бўлган ғалабаларга ўз ҳиссасини қўшди. Посбонимиз Умаров Осиё чемпионатининг “энг яхши дарвозабон” номинациясида ғолиб бўлиши мумкинми?
-  Мен бунга бир нарса дея олмайман. ОФК ва терма жамоалар мураббийлари ўртасида сўровнома ўтказилади, ушбу сўровномада ким ғолиб чиқса ўша терма жамоа посбони энг яхши бўлади. Биз учун энг муҳими Рустам Умаров айни дамда ишончли ўйин намойиш этмоқда.
 

Жаҳонгир Сотволдиев суҳбатлашди.