БАА - Ўзбекистон учрашуви келишилганмиди?

Узоқ йиллар мобайнида Ўзбекистон миллий терма жамоасида турли лавозимларда фаолият юритиб келган Алишер Никимбаев “Тезкор студия”да Жаҳон чемпионати саралашидан ўрин олган, амалда биз учун ўз аҳамиятини йўқотган сўнги тур БАА билан келишилган дея гумон қилинган учрашув ҳақида батафсил фикр билдирди.

“1997 йил, ЖЧ-1998 саралаши, Қозоғистон билан ўйиндан олдин терма жамоага бразилиялик Вега Да Силва таклиф қилинди. Биз БАА билан ўйиндан рақиб билан бирга Абу-Дабидаги меҳмонхонага жойлашдик. Амирликлар мураббийи ҳам бразилиялик эди. Улар иккиси шу ерда суҳбатлашиб қолишди. БАА устози Да Силвага шундай деганди: "Биласанми, сизлардан бир киши келиб Ўзбекистон БААга ютқазиб беришни таклиф қилди".

Ўзбекистон терма жамоасида имконият қолмаганди, БААда эса жуда кичик бўлсада имконият бор эди. Улар биздан айнан ким шундай таклиф билан чиққанини кўрсатишган, ҳозир унинг кимлигини айтмоқчи эмасман, вазият чигаллашиб кетади. У маълум муддат ўзбек футболидан йўқолиб қолди, кейинроқ қайтди ва ҳозирга қадар ишлаб келмоқда. Умуман олганда бундай ҳолатлар кўп бўлган, аммо далил доим ҳам йўқ”,- деди футбол мутахассиси.

Маълумот учун, ўша БАА - Ўзбекистон учрашуви 0:0 ҳисобида якунланган эди.