"Арсенал"нинг ёзги трансфер режаси маълум бўлди

"Арсенал" келаётган трансфер олди-бердилари даврида таркибини анчагина яхшилаб олишга умид қилмоқда.

Клуб Чемпионлар Лигасида иштироки билан эҳтимолий даромад ҳисобига камида 4 нафар футболчини ўз сафига қўшиб олмоқчи. Микель Артета жамоани икки марказий ярим ҳимоячи, вингер ва чап қанот ҳимоячиси билан кучайтириш ниятида.

Баъзи харидлар айрим ўйинчиларнинг сотилиши ҳисобига молиялаштирилиши мумкин. Келишувлардан бири Киран Тирнини ўз ичига олиши мумкин. "Кристал Пэлас"да ижара асосида тўп тепаётган Альберт-Мбойо Локонга ва "Марсел"да ўйнаётган Нуну Таравеш ҳам сотилиши эҳтимоли бор.

"Тўпчилар" "Вест Хэм" ярим ҳимоячиси Деклан Райс учун курашда "Челси"дан ўзиб кетишларига ишончи комил, футболчининг трансфер нархи 80 млн фунтни ташкил қилади. Шу билан бирга, клуб "Брайтон" ярим ҳимоячиси Мойсес Кайседога эътиборини қаратади.

"Арсенал" келаси мавсумда жамоа Чемпионлар Лигаси талабларига жавоб берадиган таркибга эга бўлиши керак, деб ҳисобламоқда.

Инглиз клуби ёзда ушбу мавсумда жароҳатлар туфайли жуда кам ўйнаган Эмиль Смит-Роунинг келажаги борасида қарор қабул қилиши керак, Шунингдек, Киллиан Мбаппедан кейин Лига 1'да тўпурарлар пойгасида иккинчи ўринда бораётган "Ренн" футболчиси Фоларин Балогун масаласида ҳам бир қарорга келиши керак. Балогун ҳужум чизиғида учинчи вариант бўлиш учун Лондонга қайтишни истамаса керак.

"Арсенал" Гранит Жака билан келишув муддатини узайтириш масаласини ҳам ҳал қилиши лозим. Унинг амалдаги битими 2024 йил ёзига қадар кучда бўлади.