Анвар Бердиев: "Кераксиз жойда очко йўқотдик"

Учрашув якунлангач мезбонлар устози Анвар Бердиев ОАВ вакиллари саволларига жавоб берди.

"Жуда қийин ўйин бўлди. Ўйин аввалида жуда яхши вазиятларни голга айлантира олмадик, аммо оддий бир вазиятда кераксиз хатога йўл қўйдик ва гол ўтказиб юбордик. Футболчиларим ҳисобни тенглаштира олишди, лекин ҳисобда олдинга чиқа олмадик. Кераксиз жойда очко йўқотдик", - дея фикр билдирди Анвар Бердиев.

- Бугун захирадан майдонга тушган футболчилар жамоангиз ўйинини қанчалик ўзгартира олди деб ўйлайсиз?
- Зоиров гол ургани сабабли ўйинга қўшилиб кета олди дея оламан, қолган футболчилар эса бугун ўзларининг энг яхши ўйинини намойиш эта олишмади.

- Мавсум якунига қадар уч тур қолди. "Дўстлик", "Машъал", "Арал" жамоаларига қарши ўйинлар бор. Қайси баҳс жамоангиз учун энг қийини бўлади?
- Ҳали олдинда бешта учрашув бор. Сиз санаб ўтган рақиблардан ташқари, "Қўқон-1912" ва "Олимпик-МобиУЗ"га қарши ўйинларимиз ҳам бор. Ҳар бир ўйинга алоҳида тайёргарлик кўрамиз. Бизда имкониятлар бўлаяпти, аммо улардан унумли фойдалана олмаяпмиз. Биринчи даврада энг кўп гол урган жамоаларнинг бири эдик. Иккинчи даврада эса ушбу кўрсаткич бўйича пасайиш кузатилмоқда. Футболчилар билан ушбу муаммо устида ишлашимиз керак.