Андрей Шипилов: "Олдиндан тайёрлаб қўйган режаларимиз иш берди"

Андрей Шипилов, “Металлург” ПФК бош мураббийи: - Биз мазкур ўйинга жуда жиддий тайёргарлик кўргандик. “Насаф” билан дурангдан кейиноқ мен футболчиларга “Сўғдиёна”га қарши учрашув жуда муҳим ва оғир кечишини уқтиргандим. Кутганимиздек бўлди. Дастлабки ўн беш, йигирма дақиқа мобайнида катта босим ҳаракатларимизга салбий таъсир кўрсатди.

Аммо тезда ўзимизга келдик. Рақибни ҳар томонлама ўрганганлигимиз қўл келди. Иккинчи бўлимдан эътибора тезликни оширдик. Ва стандарт ҳолатларга олдиндан тайёрлаб қўйган режаларимиз иш берди. Бугун барча ўйинчиларимнинг ҳаракатларидан қониқиш ҳосил қилдим. Жамоани бу ўйинга пухта тайёрлашда ёрдам берган мураббийлар штабимизга алоҳида ташаккур билдираман.

Олдинда янада қийин ўйинлар турибди. Чемпионатда пойтахтнинг икки гранд жамоаси – “Бунёдкор” ва “Пахтакор” билан куч синашамиз. Бу ўйинлар оралиғида Ўзбекистон кубогининг дастлабки босқичида Жиззахга сафар уюштирамиз. Ишлашдан, мухлисларимизни хурсанд этишдан тўхтамаймиз".