"Андижон" дастлабки йиғинни якунади

Энди жамоа аъзолари 3 январь куни яна клуб қароргоҳида йиғилади. Бу ерда мазкур йиғин 15 январгача давом этиши режалаштирилган. Шундан сўнг Тошкентга борилади. Бургутлар феврал ойида ташкил этиладиган ПФЛ Кубоги турнирида ҳам иштирок этишни мақсад қилган.

Жамоа сафидаги ўзгаришлар ҳам айнан тайёргарликнинг иккинчи қисмидан бошланади. Бу йил жамоа сафида ҳаракат қилган Юрий Цой, Акмал Турсунбоев, Афзал Азизов, Икром Ибрагимов, Фурқат Ҳасанбоев, Акрам Комилов, Андрей Сидоров каби ўйинчилар жамоанинг декабрь ойида ташкиллаштирилган йиғинида иштирок этмади. Айтишларича клуб бу футболчилар билан ҳамкорликни тўхтатган.

"Андижон" учун бегона бўлмаган Шуҳрат Мирхолдиршаев келаси йил бургутлар сафида ҳаракат қиладиган бўлди. Тажрибали футболчи 15 январдан жамоа ихтиёрига етиб келиши айтилмоқда.

Шунингдек бу йил жамоада ўйнаган Сергей Смородин, Ғиёс Комилов ва Сардор Соибовнинг яна клубда қолиши аниқ бўлган.

Бундан ташқари жамоа раҳбарияти яна бир қатор футболчилар билан музокара олиб бораётган бўлса ажаб эмас. Хориждан келиши таҳмин қилинаётган легионерлар катта эхтимол билан литвалик  футболчилардир. Маълумотларга кўра улардан бири марказий ҳимоячи бўлса, иккинчиси ҳужум чизиғида тўп тепади.