"Андижон" бош мураббийсиз йиғинга киришди

Айтиш лозимки, бош мураббий Эдгар Гесс айни дамда жамоа билан бирга эмас. Шунинг учун машғулотларни унинг ёрдамчилари Олег Тюлькин, Виталий Легай ҳамда Қаҳрамон Абдуқодиров ўтказмоқда.

Бугун соат 11:00да жамоа "Соғлом авлод" стадионида машғулот ўтказди. Йигирмага яқин футболчи иштирок этган машғулот асосан югуриш билан ўтди. Жорий мавсум жамоа шарафини ҳимоя қилган Темур Ғаниев, Муҳиддин Худоёров, Сергей Смородин, Раҳим Қодиров, Даврон Турсунов, Иброҳим Отахонов, Баҳром Абдураҳимов, Лочин Солиев, Шуҳрат Мирхолдиршаев, Мирзакамол Камолов, Аббос Махсталиев, Азиз Ибрагимов каби футболчилар ҳозирча жамоада эмас.

Ҳар холда бугунги машғулотларда уларни учратмадик. Асрор Раҳмонов, Расул Раҳмонов, Алишер Тўхтасинов, Бекзод Ғозиев, Акмал Жўрабоев, Абдулатиф Абдуқодиров, Акбар Ходжаев каби асосий таркиб аъзолари билан бирга ёшлар жамоасидан бир қатор иқтидорли ўйинчилар йиғинга жалб этилган. Янги футболчилардан маълум муддат Таиланд чемпионатида фаолият юритган Ринат Муслимов ва "Олмалиқ" ҳимоячиси Шояд Муллажонов шуғулланаётганини айтиш мумкин. Бош мураббийни шу кунларда Андижонга келиши айтилмоқда. Олинган маълумотларга кўра, жамоа футболчилар билан тўлиқ ҳисоб-китоб қилмаган. Шу боис бир қатор ўйинчилар жамоасини ўзгартириш пайида юрибди. Агарда шундай бўлса, табиийки Эдгар Яковлевичга осон бўлмайди. Чунки у янгитдан таркиб тузишга мажбур бўлади. Тайёргарлик режасига биноан футболчилар декабрь ойининг охирига қадар Андижонда шуғулланади.