Аллегрининг "Ювентус"даги келажаги маълум

Италия чемпиони "Ювентус" бош мураббийи Массимилиано Аллегри келаси мавсумда ҳам жамоада қолиши аниқ бўлди.

Кеча Туриндаги Континассе штаб-квартирасида раҳбарият ва Аллегри ўртасидаги бўлиб ўтган учрашувда кўплаб масалалар ва янги мавсум режаси муҳокама қилинди.

Учрашувда Аллегрининг клуб билан шартномасини узайтириш масаласи ижобий ҳал этилмаган. Аммо шуниси аниқки, Аллегри янги мавсумда ҳам "Ювентус"да қолади ва шартномаси якунига қадар жамоани шуғуллантиради. Аллегрининг клуб билан амалдаги шартномаси 2019 йилнинг ёзига қадар мўлжалланган. Келаси мавсум ёзда эса янги шартнома бўйича қайта музокара ўтказиш режалаштирилган.

Аллегри "Ювентус"да тўрт мавсумдан буён ишламоқда ва мураббий ҳар йили жамоага "олтин дубль" тақдим этмоқда. Аллегри ишлаган барча мавсумларда "Ювентус" Италия чемпионлиги ва Италия кубоги соҳибига айланди.

Янги мавсумда "Ювентус"нинг ҳимоя чизиғи ва марказий ярим ҳимоя қайта янгиланиши кутилмоқда. Жамоа ҳозиргача дарвозабон Маттиа Перин, марказий ҳимоячи Кальдара, қанот ҳимоячилари Спинаццола, Дармиан, ярим ҳимоячилар Бонавентура, Кристанте ҳамда Эмре Жан масаласида оғзаки келишувга эришгани маълум қилинмоқда. Тез орада ушбу трансферлар расман ҳал этилиши кутилмоқда.