Алишер Никимбаев U-23 Осиё Кубоги ташкилотчилигига баҳо берди ҳамда Ироққа қарши ўйиндаги нохуш ҳолатга муносабат билдирди

- Сизнингча, U-23 Осиё Кубоги ташкилотчилик тарафдан қандай ўтди?

- Дарҳол айтишим мумкинки, яхши савияда ўтказилди. Муаммолар ҳам учради. Бу ҳамма кўрганидек, мухлисларнинг ўзини тутиши ва "Бунёдкор" стадиони майсаси. Бироқ мухлислар пайқамайдиган, аммо мутахассислар дарҳол сезадиган ижобий ўзгаришлар кузатилди. 

Энг асосийсини айтадиган бўлсам, Осиё Кубоги мезбонлиги ҳеч нарсани англатмайди. Ўзини якка олганингизда шундай. Ўз вақтида биз 2006-2010 йиллар оралиғида 4 йилда 4 та Осиё Кубогини ўтказганмиз. Мақсад уни ўтказиш эмас, тажриба тўплаш, ўрганиш ва ЖЧни қабул қилиш эди – бу хоҳ U-17 бўлсин, хоҳ U-19... Кейинги қадам сифатида шу ўйланганди. Билишимча, вазифа ҳамон шундай.

Умуман олганда, U-23 Осиё Кубоги ташкилотчилигини 5 баллик тизимда 4 баҳога лойиқ кўрган бўлардим. Энг муҳими, раҳбарият эртами-кечми ёшлар ўртасидаги ЖЧга мезбонлик қилмоқчи. 

- U-23 Осиё Кубогида Ироқ билан ўйиндаги нохуш ҳолат ОФКнинг кейинги режаларига қандай таъсир ўтказиши мумкин?

- Кейинги йил Ўзбекистон U-20 Осиё Кубогига мезбонлик қилади. Даражаси озгина пастроқ, лекин унда ЖЧ йўлланмаси ўйналади. ОФК U-23 Осиё Кубогидаги ҳолатни унутмаган ҳолда иш кўриши аниқ. Ҳолат қайта такрорланмаслиги учун қўшимча ишлар қилинади. Албатта, ёқимсиз ҳолат кузатилди. Буни ҳамма кўрди ва муҳокама қилди. Ўйлайманки, ҳаммамиз инсонмиз ва хато қилишга мойилмиз. Асосийси, нима бўлгани эмас, унга қилинган реакция, буёғига нима қилиш масаласидир, шу асосий савол. 

ОФК жиддий қарорлар қабул қилди, чунки ташкилот нафақат Ўзбекистонни, балки қайсидир маънода ўзини ҳам жазолади. Ярим финал.. яна мухлисларсиз, бўш трибунада... Ҳатто трансляция овози умуман бошқача, худди ўртоқлик ўйинига ўхшайди. 

Хуллас, ОФК бунга жиидй аҳамият қаратди дея оламан. Бу вазият кейинги йил ўтадиган Осиё Кубоги вақтида яна муҳокама қилинади, деди Никимбаев.